اسلام آباد: اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف کارروائیاں کرتے ہوئے 2 افغانی غیر ملکی باشندوں سمیت 6 ملزمان کو گرفتار کرلیا۔ کارروائیوں کے دوران تقریباً 248 کلوگرام منشیات برآمد ہوئی جس کی مالیت 33 کروڑ 68 لاکھ روپے سے زائد بتائی جاتی ہے۔
عید میلادالنبی ﷺ کے شایان شان انتظامات، وزیراعلیٰ سندھ کی زیرصدارت اہم اجلاس
ترجمان اے این ایف کے مطابق جناح انٹرنیشنل ایئرپورٹ کراچی پر برطانیہ جانے والے افغان نژاد برطانوی شہری سے 990 نشہ آور گولیاں برآمد ہوئیں۔ اپر مال لاہور میں واقع کوریئر آفس میں قطر بھیجے جانے والے پارسل سے 800 گرام آئس برآمد کی گئی۔
سہراب گوٹھ بس ٹرمینل کراچی کے قریب ایک افغان باشندے سے 3.6 کلوگرام چرس برآمد ہوئی، جبکہ موٹروے ٹول پلازہ اسلام کے قریب گاڑی سے 2.4 کلوگرام چرس برآمد کرکے 2 ملزمان کو گرفتار کیا گیا۔ نیازی اڈہ لاہور کے قریب 2 ملزمان کے سامان سے 700 گرام آئس بھی برآمد ہوئی۔
علاوہ ازیں کلی دمان چمن میں اسمگلنگ کے لیے چھپائی گئی 240 کلوگرام ہیروئن برآمد کی گئی۔
ترجمان اے این ایف کے مطابق گرفتار ملزمان کے خلاف انسدادِ منشیات ایکٹ کے تحت مقدمات درج کرکے مزید تحقیقات شروع کر دی گئی ہیں۔
