کراچی (اسٹاف رپورٹر) انسپکٹر جنرل جیل خانہ جات سندھ، فدا حسین مستوئی نے آج ملیر جیل کا اچانک دورہ کیا۔ ان کے ہمراہ ڈپٹی انسپکٹر جنرل جیل خانہ جات کراچی ریجن، محمد اسلم بھی موجود تھے، جہاں جیل سپرنٹنڈنٹ ملیر شہاب الدین صدیقی نے ان کا استقبال کیا اور دورہ کرایا۔
نیو کراچی میں سیلنڈر دھماکے سے دکان میں آگ، ریسکیو 1122 کی بروقت کارروائی سے شعلے بجھا دیے گئے
آئی جی جیل خانہ جات نے جیل کچن کا دورہ کرکے قیدیوں کو فراہم کیے جانے والے کھانے کے معیار کا تفصیلی جائزہ لیا۔ انہوں نے جیل اسپتال کا بھی معائنہ کیا اور قیدیوں کے لیے دستیاب طبی سہولیات چیک کیں۔ علاوہ ازیں مختلف بیرکس کا دورہ کرکے قیدیوں کے رہائشی حالات کا بغور جائزہ لیا۔
انسپکٹر جنرل نے موک مشق کی نگرانی بھی کی جس میں رینجرز، ایف سی اور جیل افسران و اہلکاروں نے حصہ لیا۔ اس موقع پر انہوں نے جیل میں پودا لگا کر پودا کاری مہم کا آغاز کیا اور کہا کہ جیلوں میں سرسبز ماحول قیدیوں کی ذہنی و جسمانی صحت کے لیے نہایت ضروری ہے۔
آئی جی فدا حسین مستوئی نے جیل سپرنٹنڈنٹ شہاب الدین صدیقی کی کارکردگی کو سراہا اور ان کی انتظامی کاوشوں پر اطمینان کا اظہار کیا۔ انہوں نے کہا کہ قیدیوں کی فلاح و بہبود، معیاری سہولیات، نظم و ضبط کی بہتری اور سرسبز ماحول کا فروغ ان کی اولین ترجیحات میں شامل ہیں۔