کراچی، 20 نومبر 2025 (اسٹاف رپورٹر): کراچی میں قائم جمہوریہ انڈونیشیا کے قونصل خانے نے پی سی ہوٹل میں ایک پر وقار سفارتی استقبالیہ کا انعقاد کیا، جس میں انڈونیشیا کی آزادی کے 80 سال اور پاکستان۔انڈونیشیا کے 75 سالہ تاریخی تعلقات کا جشن منایا گیا۔ تقریب دونوں ممالک کے درمیان دیرینہ دوستی، ثقافتی ہم آہنگی اور سفارتی تعاون کی روشن مثال بنی۔
تقریب کی میزبانی قونصل جنرل انڈونیشیا جناب مدذکیر نے کی، جبکہ سندھ کی اعلیٰ قیادت میں گورنر سندھ کامران خان ٹیسوری اور وزیرِ اعلیٰ سندھ سید مراد علی شاہ نے شرکت کی۔ قونصل جنرل مدذکیر نے خطاب میں کہا کہ پاکستان اور انڈونیشیا کی دوستی اسلامی یکجہتی، مشترکہ ورثے اور جنوبی۔جنوب تعاون پر مبنی ہے اور مستقبل میں یہ تعلقات مزید مضبوط ہوں گے۔
تقریب کا مرکزی موضوع “75 سالہ پاکستان۔انڈونیشیا باہمی ترقی اور اعتماد” مقرر کیا گیا تھا۔ قونصل جنرل نے ایمرٹس ایئرلائنز، گیری ویزا سروس اور پولانی ٹریولز کا شکریہ ادا کیا، جن کی مدد سے چھ خوش نصیب مہمانوں نے انڈونیشیا کا سفر کیا۔
سب سے دلچسپ لمحہ انڈونیشیا کے روایتی رقص ’تاری پیرنگ‘ (پلیٹ ڈانس) کا مظاہرہ تھا، جس میں برق رفتار حرکات، منفرد انداز اور خوبصورت موسیقی نے شرکاء کو مسحور کر دیا۔ تقریب میں بڑی تعداد میں سفارتکاروں، حکومتی شخصیات، کارپوریٹ رہنماؤں اور دیگر معزز مہمانوں نے شرکت کی، جو دونوں ممالک کے مضبوط ہوتے تعلقات کا ثبوت ہے۔
