اسلام آباد (اسٹاف رپورٹر) صدر مملکت آصف علی زرداری نے انسدادِ دہشت گردی (ترمیمی) بل 2025 کی منظوری دے دی ہے۔ ایوانِ صدر کے اعلامیے کے مطابق نیا قانون سکیورٹی اداروں کی دہشت گردی کے خلاف صلاحیت کو مزید مؤثر بنانے میں مددگار ثابت ہوگا۔
اعلامیے میں بتایا گیا کہ بل میں شفافیت اور احتساب کو یقینی بنایا گیا ہے جبکہ تین سالہ "سن سیٹ کلاز” بھی شامل ہے تاکہ اس کی مدت محدود رہے۔ قانون میں عدالتی نگرانی اور شہری آزادیوں کے تحفظ کے اقدامات بھی شامل کیے گئے ہیں۔
ماہرین نے اس قانون کو پاکستان کو درپیش سکیورٹی چیلنجز سے نمٹنے کے لیے اہم سنگِ میل قرار دیا ہے۔ صدر کی منظوری کے بعد یہ قانون فوری طور پر نافذالعمل ہوگیا ہے اور متعلقہ ادارے اس پر عملدرآمد شروع کر دیں گے۔
واضح رہے کہ گزشتہ روز صدر آصف علی زرداری نے پٹرولیم ترمیمی بل 2025 کی بھی منظوری دی تھی جس کے تحت سمگلنگ اور غیر قانونی پٹرول پمپس کے خلاف سخت اقدامات، آئی ٹی بیسڈ ٹریکنگ سسٹم، ضبطگی کے اختیارات اور سخت سزائیں متعارف کرائی گئی ہیں۔