ترجمان دفتر خارجہ شفقت علی خان نے ہفتہ وار میڈیا بریفنگ کے دوران کہا ہے کہ پاکستان ہمیشہ بھارت کے ساتھ پرامن اور دوستانہ تعلقات کا خواہاں رہا ہے، لیکن بھارت کی تیز رفتار عسکری تیاریوں اور ملٹرائزیشن پر ہمیں سنجیدہ تحفظات ہیں۔ پاکستان کسی بھی خطرے سے نمٹنے کے لیے پوری طرح تیار ہے۔
وزیراعظم شہباز شریف کا ای سی او سربراہی اجلاس سے خطاب غزہ کشمیر اور علاقائی امن پر پاکستان کا دوٹوک مؤقف
انہوں نے کہا کہ سارک کانفرنس کی میزبانی پاکستان کرے گا اور جب بھی اجلاس ہوگا، وہ اسلام آباد میں ہی منعقد ہوگا۔ تاہم، اس عمل میں صرف ایک رکاوٹ ہے اور وہ بھارت ہے، جو اجلاس کے انعقاد میں مسلسل رکاوٹ ڈال رہا ہے۔ ترجمان نے عالمی برادری کی توجہ بھارت کی بڑھتی ہوئی عسکری تیاریوں اور جارحانہ رویے کی طرف مبذول کروانے پر زور دیا۔
شفقت علی خان نے واضح کیا کہ شنگھائی تعاون تنظیم (ایس سی او) کی وزرائے دفاع کانفرنس کے موقع پر بھارتی مشیر قومی سلامتی سے کوئی ملاقات نہیں ہوئی۔
ترجمان نے ایران اور اسرائیل کے حوالے سے پاکستان کے مؤقف کو دوٹوک قرار دیا اور کہا کہ ہم افغانستان کے ساتھ قریبی تعلقات کے خواہاں ہیں اور دہشت گردی کے معاملے پر مسلسل افغان حکام سے رابطے میں ہیں۔
انہوں نے کہا کہ پاکستان، چین کی خودمختاری کا مکمل احترام کرتا ہے اور تبت کے حوالے سے بیجنگ کے مؤقف کی حمایت کرتا ہے۔ ساتھ ہی پاکستان نے کشمیری حریت رہنما شبیر احمد شاہ کی نئی دہلی کی جیل سے فوری رہائی کا بھی مطالبہ کیا ہے۔
ترجمان دفتر خارجہ نے روس کی جانب سے افغانستان میں طالبان حکومت کو تسلیم کرنے کی خبروں پر ردعمل دیتے ہوئے کہا کہ روس خطے کا ایک اہم ملک ہے، ہم ان تبدیلیوں کو نوٹ کر رہے ہیں۔ یہ افغانستان اور روس کا باہمی معاملہ ہے۔
انہوں نے بھارت کے زیرانتظام اتراکھنڈ میں مسلمانوں کے مزارات کی مسماری کی شدید مذمت کرتے ہوئے کہا کہ یہ اقدام بھارت کی مسلم دشمنی کی واضح عکاسی کرتا ہے۔