اسلام آباد (اسٹاف رپورٹر) پاکستان میں ٹیلی کام ڈیٹا کے استعمال میں گزشتہ تین برسوں کے دوران غیر معمولی اضافہ ریکارڈ کیا گیا ہے، جہاں سال 2024-25 میں یہ مقدار 27,897 پیٹا بائٹس تک پہنچ گئی۔ یہ اعداد و شمار پاکستان ٹیلی کمیونی کیشن اتھارٹی (پی ٹی اے) کی حالیہ رپورٹ میں جاری کیے گئے ہیں۔
جنوبی افریقہ کی فضائیہ کے سربراہ کا جوائنٹ اسٹاف ہیڈ کوارٹرز کا دورہ، دفاعی تعاون بڑھانے پر اتفاق
پی ٹی اے کے مطابق، 2022-23 میں ڈیٹا کا استعمال 20,235 پیٹا بائٹس رہا تھا جبکہ 2023-24 میں یہ 25,141 پیٹا بائٹس تھا، جس کے مقابلے میں رواں سال 37.84 فیصد اور سالانہ 10.96 فیصد کا اضافہ ریکارڈ کیا گیا۔
رپورٹ میں کہا گیا ہے کہ اسٹریمنگ، آن لائن تعلیم، ای کامرس اور موبائل ایپلیکیشنز کے بڑھتے استعمال نے ڈیٹا کی مانگ کو کئی گنا بڑھا دیا ہے۔
براڈ بینڈ صارفین اور رسائی میں اضافہ
براڈ بینڈ سبسکرائبرز کی تعداد میں بھی نمایاں اضافہ ہوا، جو 2022-23 میں 12 کروڑ 76 لاکھ تھی، اب بڑھ کر 15 کروڑ تک پہنچ گئی ہے۔ یہ تین سالوں میں 17.55 فیصد اور پچھلے سال کی نسبت 8.47 فیصد اضافہ ہے۔
اسی طرح براڈ بینڈ پینیٹریشن بھی 53.6 فیصد سے بڑھ کر 60.8 فیصد ہوگئی، جو ملک بھر میں انٹرنیٹ کی وسیع تر دستیابی کا مظہر ہے۔
صارفین میں اضافہ مگر مارکیٹ سیر شدہ
ٹیلی کام صارفین کی مجموعی تعداد 20 کروڑ تک جا پہنچی ہے، جو 2022-23 کے مقابلے میں 3.36 فیصد اور سالانہ 2.51 فیصد کا اضافہ ہے۔
تاہم، ٹیلی ڈینسٹی (موبائل فون استعمال کرنے والے افراد کی شرح) 81.21 فیصد پر تقریباً مستحکم رہی، جس سے ظاہر ہوتا ہے کہ مارکیٹ اب سیر شدہ (saturated) مرحلے میں داخل ہوچکی ہے۔
ملک بھر میں موبائل ٹاورز (سیل سائٹس) کی تعداد بھی 57,888 تک جا پہنچی ہے، جو 8.03 فیصد اضافہ ظاہر کرتی ہے، تاکہ بڑھتی ہوئی ڈیجیٹل ضروریات کو پورا کیا جا سکے۔
آمدنی میں کمی، مگر قومی خزانے میں حصہ بڑھا
اگرچہ صارفین اور نیٹ ورک میں اضافہ ہوا ہے، مگر ٹیلی کام سیکٹر کی آمدنی میں نمایاں کمی دیکھی گئی۔
2023-24 میں آمدنی 955 ارب روپے رہی جبکہ 2024-25 میں یہ کم ہو کر 803 ارب روپے رہ گئی، یعنی 15.91 فیصد کمی۔
البتہ قومی خزانے میں اس شعبے کا حصہ 271 ارب روپے رہا، جو پچھلے سال کے 195.1 ارب کے مقابلے میں بہتری کی علامت ہے، اگرچہ 2022-23 کے 341 ارب سے اب بھی کم ہے۔
رپورٹ اس بات کی عکاسی کرتی ہے کہ پاکستان کا ٹیلی کام سیکٹر ایک جانب صارفین کے اعتبار سے ترقی کر رہا ہے، مگر آمدنی میں اتار چڑھاؤ، مارکیٹ کی تبدیلی اور صارفین کے رجحانات ابھرتے ہوئے چیلنجز بن چکے ہیں۔