کراچی میں مون سون کے پہلے اسپیل کے دوران کے-الیکٹرک کی فیلڈ ٹیمیں شہر بھر میں بجلی کی بلا تعطل فراہمی اور شہریوں کی حفاظت کو یقینی بنانے کے لیے مسلسل سرگرم رہیں۔ ترجمان کے مطابق ادارے کے 2,100 سے زائد فیڈرز میں سے اکثریت بارش کے دوران مستحکم رہی۔
کچے میں شاندار کارکردگی، شکارپور پولیس ٹیم کو اعزازات سے نوازا گیا
تاہم بعض علاقوں میں غیرقانونی کنکشنز، انفراسٹرکچر سے چھیڑ چھاڑ اور حفاظتی اصولوں کی خلاف ورزی کے باعث وقتی معطلی کی شکایات موصول ہوئیں، جنہیں فوری کارروائی کے ذریعے بحال کر دیا گیا۔
دھابیجی، نارتھ ایسٹ کراچی (NEK) سمیت اہم پمپنگ اسٹیشنز پر بجلی کی فراہمی کو ترجیح دی گئی۔ نیو NEK II اور III اسٹیشنز مکمل فعال رہے۔ تاہم NEK اولڈ اسٹیشن پر صارف کی سسٹم میں خرابی کے باعث بعض علاقوں میں پانی کی سپلائی متاثر ہوئی، جسے فوری درست کیا گیا۔
افسوسناک واقعات اور وضاحتیں:
ترجمان کے-الیکٹرک نے مون سون کے دوران ہونے والے حادثات پر افسوس کا اظہار کرتے ہوئے کہا کہ پانچ میں سے بیشتر واقعات کا براہِ راست تعلق کے-الیکٹرک کے سسٹم سے نہیں تھا۔
کورنگی 32-بی میں واقعہ صارف کے احاطے میں پانی کی موٹر کی مرمت کے دوران پیش آیا۔
سائٹ، سرجانی، اور نیو کراچی 11-J میں واقعات اندرونی وائرنگ کی خرابی کے سبب ہوئے۔
منگھوپیر میں کرنٹ لیکج کی کوئی تصدیق نہیں ہوئی۔
کورنگی سیکٹر 9 میں زیرِ تعمیر عمارت میں غیرقانونی بریکٹ منتقلی حادثے کا باعث بنی۔
کلفٹن بلاک 5 میں زیر زمین کیبل چوری کی کوشش کے دوران نقصان ہوا۔
لیاری واقعے کی تحقیقات جاری ہیں، ابتدائی شواہد کے مطابق کے-الیکٹرک کا سسٹم ملوث نہیں۔
احتیاطی اپیل:
کے-الیکٹرک نے شہریوں سے اپیل کی ہے کہ بارش کے دوران بجلی کی تنصیبات سے دور رہیں اور کسی بھی خطرناک صورتحال کی اطلاع 118 یا واٹس ایپ سروس پر دیں۔ سوشل میڈیا پلیٹ فارمز پر بھی رہنمائی فراہم کی جا رہی ہے۔
ترجمان عمران رانا کا بیان:
"مون سون کے دوران شہریوں کی سلامتی صرف آپریشنل تیاری سے نہیں بلکہ شہری ذمے داری سے بھی وابستہ ہے۔ حفاظتی اصولوں کی پابندی اور ادارہ جاتی تعاون سے ہی ممکنہ خطرات کم کیے جا سکتے ہیں۔”