کراچی: مہاجر قومی موومنٹ نے پیکا قانون کو سیاسی مخالفین کی آواز دبانے اور عوام کو آزادیِ اظہار جیسے بنیادی حق سے محروم کرنے کا حربہ قرار دیتے ہوئے اسے مکمل طور پر مسترد کر دیا ہے۔ پارٹی نے حکومت سے مطالبہ کیا ہے کہ اگر یہ قانون واقعی شہریوں کی عزت و شہرت کو نقصان سے بچانے کے لیے بنایا گیا ہے تو ماضی میں مہاجر قوم کے خلاف کیے گئے جھوٹے پروپیگنڈے اور سازشوں کی تحقیقات کے لیے عدالتی کمیشن تشکیل دیا جائے۔
سندھ حکومت کا کراچی میں پیٹرول پمپ مافیاز کے خلاف کریک ڈاؤن
پارٹی نے پیکا قانون کو ایک ایسی کوشش قرار دیا ہے جس کا مقصد حکومتی کرپشن اور نااہلی پر پردہ ڈالنا اور ناقدین کو خاموش کرنا ہے۔ ان کا کہنا ہے کہ 2022 میں بھی ایسا ہی ایک قانون بنایا گیا تھا، جسے اسلام آباد ہائی کورٹ نے کالعدم قرار دے دیا تھا۔
مہاجر قوم کے خلاف سازشیں:
مہاجر قومی موومنٹ نے اپنے بیان میں کہا کہ ماضی میں مہاجر قوم کے خلاف جناح پور جیسے جھوٹے پروپیگنڈے کیے گئے، مہاجر نوجوانوں کو جھوٹے الزامات کے تحت گرفتار کیا گیا، اور ان پر دہشت گردی کے الزامات لگائے گئے۔ یہاں تک کہ مہاجر بستیوں سے جھوٹے دعوے کے تحت ٹارچر سیل اور ہتھیار برآمد کرنے کی خبریں چلائی گئیں تاکہ قوم کو بدنام کیا جا سکے۔
پارٹی نے الزام لگایا کہ حکومتی مشینری نے منصوبہ بندی کے تحت مہاجر قوم کو بدنام کرنے کی کوشش کی، جو تعلیم یافتہ اور مہذب ہونے کے لیے مشہور تھی۔ یہ سب مہاجر قوم کو اس کے جائز حقوق سے محروم رکھنے اور عوام میں نفرت پیدا کرنے کے لیے کیا گیا۔
سوشل میڈیا پر قدغن کی مخالفت:
پارٹی نے کہا کہ سوشل میڈیا آج کے دور میں عوام کی آواز بن چکا ہے، جو حکومتی دباؤ سے آزاد ہے۔ حکومت پیکا قانون کے ذریعے سوشل میڈیا کا گلا گھونٹ کر عوام کو خاموش کرنے کی کوشش کر رہی ہے۔
مہاجر قومی موومنٹ نے مطالبہ کیا کہ:
ماضی میں مہاجر قوم کے خلاف کیے گئے پروپیگنڈے کی تحقیقات کے لیے عدالتی کمیشن تشکیل دیا جائے۔
جھوٹے الزامات میں ملوث افراد اور عناصر کو انصاف کے کٹہرے میں لایا جائے۔
مہاجر قوم کی شہرت کو نقصان پہنچانے پر حکومت معافی مانگے۔