کراچی: صوبائی وزیرِ بلدیات سید ناصر حسین شاہ کی ہدایات پر سندھ بلڈنگ کنٹرول اتھارٹی (ایس بی سی اے) نے جنوری 2026 کے دوران شہر بھر میں غیر قانونی تعمیرات کے خلاف بھرپور، مؤثر اور بلاامتیاز کارروائیاں کرتے ہوئے مجموعی طور پر 147 غیر قانونی تعمیرات کے خلاف ایکشن لیا۔
ایس بی سی اے کے ڈائریکٹر جنرل مزمل حسین ہالیپوٹو کے مطابق سب سے زیادہ کارروائیاں ڈسٹرکٹ ایسٹ میں کی گئیں جہاں 68 غیر قانونی تعمیرات کو مسمار کیا گیا۔ ڈسٹرکٹ سینٹرل میں 46 اور ڈسٹرکٹ ساؤتھ میں 13 غیر قانونی تعمیرات کے خلاف انہدامی کارروائی عمل میں لائی گئی۔
اسی طرح کورنگی میں 6، ویسٹ ڈسٹرکٹ میں 5، ڈسٹرکٹ کیماڑی میں 4 اور انڈسٹریل زون میں 3 غیر قانونی تعمیرات کے خلاف کارروائی کی گئی، جبکہ ڈسٹرکٹ ملیر میں بھی ایک غیر قانونی تعمیر کے خلاف قانونی ایکشن لیا گیا۔
ایس بی سی اے حکام کا کہنا ہے کہ غیر قانونی تعمیرات کے خلاف یہ کارروائیاں آئندہ بھی بلاامتیاز جاری رہیں گی تاکہ شہریوں کی جان و مال کا تحفظ یقینی بنایا جا سکے اور کراچی میں قانونی، منظم اور محفوظ تعمیراتی نظام کو فروغ دیا جا سکے۔