ڈی آئی جی ایسٹ زون ڈاکٹر فرخ علی کی زیرِ صدارت خصوصی ٹاسک فورس کا دوسرا اجلاس کورنگی ایسوسی ایشن آف ٹریڈ اینڈ انڈسٹری (کاٹی) کے آفس میں منعقد ہوا۔ اجلاس میں خصوصی ٹاسک فورس کے افسران اور کاٹی کے معزز اراکین نے شرکت کی۔
اجلاس کے دوران صنعتی علاقوں میں امن و امان کی صورتحال، فیکٹری مالکان کو تحفظ فراہم کرنے کے لیے کیے گئے عملی اقدامات اور حالیہ گرفتاریوں پر تفصیلی بریفنگ دی گئی۔ کاٹی کے اراکین نے مطالبہ کیا کہ گرفتار ملزمان کو کیفرِ کردار تک پہنچایا جائے، مزید نامزد ملزمان کو گرفتار کیا جائے اور بلیک میلنگ میں ملوث لیبر لیڈرز کی پشت پناہی کرنے والے عناصر کا بھی قلع قمع کیا جائے۔
ٹاسک فورس کے سربراہ ڈی آئی جی ایسٹ زون ڈاکٹر فرخ علی نے اجلاس سے خطاب کرتے ہوئے کہا کہ فیکٹری مالکان کو ہراساں کرنے، ناجائز مطالبات منوانے، بلیک میلنگ اور بھتہ خوری جیسے معاملات میں زیرو ٹالرنس پالیسی پر سختی سے عمل کیا جا رہا ہے۔ انہوں نے کہا کہ ایسٹ زون پولیس کی بھرپور کوشش ہے کہ صنعتکاروں کو بلا خوف و خطر اپنی کاروباری سرگرمیاں جاری رکھنے کے لیے پُرامن اور سازگار ماحول فراہم کیا جائے۔
ڈی آئی جی ایسٹ زون نے مزید ہدایت کی کہ فیکٹری مالکان کی شکایات کا فوری اور بروقت ازالہ یقینی بنایا جائے اور شرپسند عناصر کے خلاف مؤثر کارروائی عمل میں لائی جائے۔ اجلاس میں اچھی کارکردگی کا مظاہرہ کرنے پر ٹاسک فورس کے سربراہ اور کاٹی کے عہدیداران کی جانب سے ڈسٹرکٹ کورنگی کے افسران کو شاباش بھی دی گئی۔
اجلاس کے اختتام پر صدر کاٹی اکرام راجپوت، زبیر چھایا، مسعود نقی، محمد دانش خان اور دیگر معزز عہدیداران نے خصوصی ٹاسک فورس کے مؤثر اور عملی اقدامات کو سراہتے ہوئے اظہارِ تشکر کیا۔
