کراچی: پاکستان پیپلز پارٹی کے صوبائی صدر نثار کھوڑو ضلع وسطی کے دفتر پہنچے جہاں پارٹی عہدیداران اور کارکنان نے ان کا پرتپاک استقبال کیا۔
نیو کراچی میں گٹکا ماوا فروشی، ایک ملزم گرفتار
اس موقع پر ضلع وسطی کے صدر سردار خان، شہزاد مجید، اسد حنیف، توقیر احمد، عاطف بلوچ سمیت دیگر ذمہ داران بھی موجود تھے۔ نثار کھوڑو نے خطاب میں کہا کہ ماضی میں سانگھڑ اور نوشہرہ فیروز کو کسی اور جماعت کا گڑھ سمجھا جاتا تھا، مگر آج یہ علاقے پاکستان پیپلز پارٹی کے مضبوط قلعے بن چکے ہیں۔
صوبائی صدر نے کہا کہ کراچی کا میئر پہلی بار پاکستان پیپلز پارٹی سے منتخب ہوا، جو پارٹی کی مسلسل جدوجہد اور عوام کے اعتماد کا ثبوت ہے۔ انہوں نے پارٹی کے شہدا کی قربانیوں کو پارٹی کی اصل طاقت قرار دیا اور کہا کہ یہ ایک طویل اور مشکل سفر تھا جسے صبر اور استقامت کے ساتھ طے کیا گیا۔
نثار کھوڑو نے عہدیداران کو ہدایت کی کہ نئے افراد کو خوش آمدید کہا جائے اور اچھے کردار رکھنے والے افراد کو پارٹی میں شامل کیا جائے۔ مزید کہا کہ زیادہ سے زیادہ خواتین کو بے نظیر انکم سپورٹ پروگرام میں رجسٹرڈ کرایا جائے تاکہ مستحق خاندانوں کو ریلیف فراہم کیا جا سکے۔
انہوں نے رینجرز اور پولیس کے تعاون سے کراچی میں قائم امن کا حوالہ دیتے ہوئے کہا کہ اس سے عوام کو براہِ راست فائدہ پہنچا ہے۔ نثار کھوڑو نے ضلع وسطی کو اہم سیاسی معرکہ قرار دیا اور کارکنان سے بھرپور محنت اور عوامی رابطہ مہم کی اپیل کی۔
تقریب کے اختتام پر گل پلازہ سانحے میں جاں بحق اور لاپتا افراد کے لیے خصوصی دعا بھی کی گئی۔
