کراچی (15 مارچ 2026): گورنر سندھ محمد نہال ہاشمی نے وزیرِ اعظم یوتھ پروگرام سندھ کے کوآرڈینیٹر ڈاکٹر فہد شفیق اور پروگرام کی کور ٹیم کے ہمراہ ملاقات میں نوجوانوں کی تعلیم، روزگار اور ترقی کے مواقع بڑھانے کی اہمیت پر زور دیا۔
وزیراعلیٰ سندھ کا اسلاموفوبیا کے عالمی دن پر پیغام: نفرت کے بجائے برداشت کو فروغ دیں
گورنر سندھ نے کہا کہ نوجوان ہمارے ملک کا مستقبل ہیں اور انہیں جدید آئی ٹی تعلیم اور ترقی کے مواقع فراہم کرنا وقت کی اہم ضرورت ہے۔ انہوں نے کہا کہ وزیرِ اعظم شہباز شریف نوجوانوں کے لیے لیپ ٹاپ اسکیم سمیت مختلف منصوبوں کے دائرہ کار کو مزید وسیع کر رہے ہیں تاکہ نوجوانوں کو جدید تعلیم اور پیشہ ورانہ تربیت کے ذریعے بااختیار بنایا جا سکے۔
محمد نہال ہاشمی نے بتایا کہ موجودہ حکومت نوجوانوں کے روشن مستقبل اور عوام کی فلاح و بہبود کے لیے سنجیدہ اور عملی اقدامات کر رہی ہے۔ وزیرِ اعظم یوتھ پروگرام کے تحت نوجوانوں کی ترقی کے لیے چار اہم شعبوں (4Es) پر خصوصی توجہ دی جا رہی ہے: تعلیم، روزگار، کاروباری مواقع، سماجی شمولیت اور ماحولیاتی تحفظ۔
انہوں نے مزید کہا کہ ڈیجیٹل یوتھ ہب کے ذریعے نوجوانوں کو وظائف، ملازمتوں اور کاروباری مواقع تک آسان رسائی فراہم کی جا رہی ہے، تاکہ وہ معاشرے میں مثبت کردار ادا کر سکیں اور اپنی صلاحیتوں کو بھرپور طریقے سے بروئے کار لا سکیں۔
گورنر سندھ نے زور دیا کہ پروگرام نوجوانوں کو بااختیار بنانے اور انہیں معاشرتی و اقتصادی مواقع فراہم کرنے میں اہم کردار ادا کر رہا ہے، اور حکومت ہر ممکن اقدامات کر رہی ہے تاکہ نوجوان ملک کی ترقی میں فعال حصہ لے سکیں۔