انسپکٹر جنرل پولیس سندھ جاوید عالم اوڈھو کی ڈی آئی جی سکھر آفس آمد پر پولیس کے خصوصی دستے نے انہیں سلامی پیش کی۔ اس موقع پر امن و امان کی مجموعی صورتحال کا جائزہ لینے کے لیے اعلیٰ سطحی اجلاس منعقد کیا گیا۔
کراچی کی ترقی کے لیے تاریخی پیکج، وزیراعلیٰ سندھ کا ایف ڈبلیو او کے ساتھ شراکت داری سے میگا منصوبے شروع کرنے کا اعلان
اجلاس میں آئی جی سندھ کو جرائم کے خلاف پولیس اقدامات، کامیاب کارروائیوں اور حاصل شدہ اہداف سے متعلق تفصیلی بریفنگ دی گئی۔ بریفنگ میں بتایا گیا کہ کچہ اور پکا دونوں علاقوں میں پولیس دستے مکمل طور پر متحرک اور مستعد ہیں۔
آئی جی سندھ کو آگاہ کیا گیا کہ ڈاکوؤں کی کمین گاہوں کو مسمار کیا جا رہا ہے جبکہ ان کے سہولتکاروں کے خلاف بھی سخت کارروائیاں عمل میں لائی جا رہی ہیں۔ جدید ٹیکنالوجی اور انٹیلی جنس بیسڈ آپریشنز کے ذریعے جرائم پیشہ عناصر کا مسلسل تعاقب کیا جا رہا ہے۔
بریفنگ کے دوران بتایا گیا کہ کچہ کے علاقوں میں پولیس کی مستقل موجودگی کو یقینی بنایا جا رہا ہے تاکہ جرائم کی جڑ سے بیخ کنی ممکن بنائی جا سکے۔
اجلاس سے خطاب کرتے ہوئے وزیر داخلہ سندھ ضیاء الحسن لنجار نے پولیس کی پیشہ ورانہ کارکردگی کو تسلی بخش اور قابلِ تحسین قرار دیا۔ انہوں نے ہدایت دی کہ کچہ اور پکا ایریاز میں جرائم کے مکمل خاتمے کے لیے مربوط اور مؤثر حکمت عملی اپنائی جائے۔
وزیر داخلہ سندھ نے واضح کیا کہ ڈاکوؤں اور ان کے سہولتکاروں کے خلاف کارروائیاں مزید مؤثر بنائی جائیں گی اور ریاستی رٹ کو چیلنج کرنے والوں سے آہنی ہاتھوں سے نمٹا جائے گا۔ انہوں نے کہا کہ امن و امان کے قیام کے لیے تمام دستیاب وسائل بروئے کار لائے جا رہے ہیں اور عوام کے جان و مال کے تحفظ میں کسی قسم کی کوتاہی برداشت نہیں کی جائے گی۔