اسلام آباد: ورلڈ بینک گروپ کے نجی شعبے سے متعلق ادارے انٹرنیشنل فنانس کارپوریشن (IFC) نے پاکستان میں اپنی پہلی مقامی کرنسی سرمایہ کاری کا اعلان کر دیا ہے، جس کا مقصد زرعی شعبے کو مستحکم کرنا اور غذائی تحفظ کو فروغ دینا ہے۔
انڈر 19 ایشیا کپ فائنل: سرفراز احمد کا بھارتی کھلاڑیوں کے رویے پر اعتراض
آئی ایف سی کی جانب سے منگل کو جاری کی گئی پریس ریلیز کے مطابق یہ سرمایہ کاری پاکستانی روپے میں 33 ارب 60 کروڑ روپے تک کی غیر فنڈڈ جزوی کریڈٹ گارنٹی کی صورت میں کی گئی ہے۔ اس گارنٹی کے تحت اسٹینڈرڈ چارٹرڈ بینک پاکستان لمیٹڈ، اینگرو فرٹیلائزرز لمیٹڈ کو طویل المدتی فنانسنگ فراہم کرے گا۔
پریس ریلیز میں کہا گیا کہ یہ شراکت پاکستان میں آئی ایف سی کی پہلی مقامی کرنسی سرمایہ کاری ہے، جس کے ذریعے مقامی اور غیر ملکی دونوں کرنسیوں میں طویل المدتی فنانسنگ تک رسائی میں توسیع ہوگی۔ یہ اقدام خاص طور پر زراعت اور مائیکرو، اسمال اور میڈیم انٹرپرائزز جیسے اہم شعبوں میں معاشی ترقی کے لیے کلیدی اہمیت رکھتا ہے۔
آئی ایف سی کے مطابق اس فنانسنگ سے مقامی سرمائے کو متحرک کیا جائے گا، جس سے اینگرو فرٹیلائزرز کو پاکستان میں زرعی ویلیو چین مضبوط بنانے میں مدد ملے گی۔ یہ سرمایہ کاری آئی ایف سی کینیڈا کی فیسلٹی فار ریزیلینٹ فوڈ سسٹمز کی جانب سے فراہم کردہ فرسٹ لاس کاؤنٹر گارنٹی سے بھی مستفید ہوگی۔
پریس ریلیز میں مزید بتایا گیا کہ مقامی کرنسی میں فنانسنگ کے استعمال سے اینگرو فرٹیلائزرز اپنے آپریشنل استحکام میں اضافہ کر سکے گی اور مقامی سرمائے کے مؤثر استعمال کو فروغ ملے گا۔ اس فنانسنگ کے ذریعے کمپنی اپنی تنصیبات کی دیکھ بھال اور دیگر سرگرمیوں میں سرمایہ کاری کرے گی، جس سے یوریا اور دیگر کھادوں کی بلا تعطل فراہمی یقینی بنائی جا سکے گی۔
آئی ایف سی کے مطابق یہ فنانسنگ کسانوں کے لیے جاری پروگراموں کی معاونت بھی کرے گی تاکہ اینگرو کے بنیادی مشن، یعنی قابلِ اعتماد اور پائیدار پیداوار، کو تقویت دی جا سکے۔
پریس ریلیز میں بتایا گیا کہ پاکستان میں زرعی شعبہ مجموعی قومی پیداوار کا 24 فیصد، برآمدات کا 70 فیصد اور روزگار کا 40 فیصد فراہم کرتا ہے، جو اسے ملکی معیشت کی طویل المدتی ترقی کے لیے نہایت اہم بناتا ہے۔
اینگرو فرٹیلائزرز کے چیف ایگزیکٹو آفیسر علی کے حوالے سے کہا گیا کہ اینگرو پاکستان کے اہم مسائل کو بامعنی انداز میں حل کرنے کے لیے پرعزم ہے۔ مقامی سرمائے کے ذریعے ویلیو چینز کو مضبوط بنانا کسانوں اور ملکی معیشت سے ہماری وابستگی کا مظہر ہے۔ انہوں نے آئی ایف سی اور اسٹینڈرڈ چارٹرڈ بینک کا تعاون پر شکریہ ادا کیا۔
آئی ایف سی کے مشرق وسطیٰ اور وسطی ایشیا کے لیے مینوفیکچرنگ، ایگری بزنس اور سروسز کے ریجنل انڈسٹری ہیڈ اشرف مجاہد نے کہا کہ یہ سرمایہ کاری اینگرو فرٹیلائزرز اور اسٹینڈرڈ چارٹرڈ بینک کے ساتھ مضبوط شراکت داری اور پائیدار حل تلاش کرنے کے مشترکہ عزم کی عکاسی کرتی ہے۔ اس منصوبے سے مقامی کرنسی میں طویل المدتی فنانسنگ کے نئے مواقع پیدا ہوں گے، جو زرعی شعبے میں مالی استحکام کو سہارا دیں گے۔
اسی طرح اسٹینڈرڈ چارٹرڈ پاکستان کے چیف ایگزیکٹو آفیسر اور ہیڈ آف کوریج ریحان شیخ نے کہا کہ بینک پاکستان کی معیشت میں پائیدار ترقی اور طویل المدتی استحکام کے لیے مؤثر فنانسنگ حل فراہم کرنے کے لیے پرعزم ہے۔
واضح رہے کہ آئی ایف سی کا یہ اعلان اسٹیٹ بینک آف پاکستان اور آئی ایف سی کے درمیان مقامی کرنسی میں نجی شعبے کی فنانسنگ بڑھانے کے معاہدے کے تقریباً دو ماہ بعد سامنے آیا ہے، جس کے تحت آئی ایف سی کو پاکستانی روپے میں سرمایہ کاری اور زرِ مبادلہ کے خطرات بہتر انداز میں سنبھالنے کی سہولت حاصل ہوئی ہے۔