اسلام آباد: قومی انڈر 19 کرکٹ ٹیم کے مینٹور اور سابق کپتان سرفراز احمد نے کہا ہے کہ انڈر 19 ایشیا کپ کے فائنل کے دوران بھارتی کھلاڑیوں کا رویہ کھیل کی روایات کے مطابق نہیں تھا، تاہم پاکستانی کھلاڑیوں نے اسپورٹس مین اسپرٹ کا مظاہرہ کیا۔
امریکا نے پاکستان کے ایف 16 بیڑے کے لیے 68 کروڑ 60 لاکھ ڈالر کے اپ گریڈ پیکج کی منظوری دے دی
انڈر 19 ایشیا کپ میں تاریخی کامیابی کے بعد قومی ٹیم کے کوچنگ اسٹاف اور کھلاڑیوں نے اسلام آباد میں مشترکہ پریس کانفرنس کی۔ اس موقع پر ٹیم کے مینٹور سرفراز احمد نے کہا کہ فائنل میں دباؤ کے باوجود نوجوان کھلاڑیوں نے تحمل اور نظم و ضبط کا مظاہرہ کیا، جبکہ بھارتی ٹیم کا رویہ نامناسب رہا۔
پریس کانفرنس سے خطاب کرتے ہوئے انڈر 19 ٹیم کے ہیڈ کوچ شاہد انور نے کہا کہ ایشیا کپ کے لیے ٹیم نے منظم اور بھرپور تیاری کی تھی۔ کھلاڑیوں نے کوچنگ اسٹاف کی دی گئی حکمتِ عملی پر مکمل عمل کیا، جس کا نتیجہ شاندار کامیابی کی صورت میں سامنے آیا۔
سرفراز احمد نے بتایا کہ وزیراعظم کی جانب سے انڈر 19 ٹیم کے کھلاڑیوں کے لیے فی کس ایک کروڑ روپے کے انعام کا اعلان کیا گیا ہے، جو نوجوان کرکٹرز کے لیے حوصلہ افزا اقدام ہے۔ انہوں نے کہا کہ بھارت کو شکست دے کر کھلاڑیوں نے پوری قوم کا سر فخر سے بلند کیا۔
ان کا کہنا تھا کہ فائنل میں سمیر منہاس نے شاندار اننگز کھیلی، جبکہ دیگر کھلاڑیوں نے بھی مجموعی طور پر عمدہ کارکردگی کا مظاہرہ کیا۔ اس کامیابی سے ورلڈ کپ سے قبل ٹیم کے اعتماد میں نمایاں اضافہ ہوا ہے۔
ایک سوال کے جواب میں سرفراز احمد نے کہا کہ فی الحال انڈر 19 ٹیم کے مینٹور کی حیثیت سے خدمات انجام دینا ہی ان کی ترجیح ہے، جبکہ ایسی بڑی کامیابیاں نوجوان کھلاڑیوں کے اعتماد کو مزید مضبوط کرتی ہیں۔
ٹیم کے کپتان فرحان یوسف نے کہا کہ ٹیم مینجمنٹ نے کھلاڑیوں کو بھرپور سپورٹ فراہم کی، جس کے باعث میدان میں بہترین نتائج حاصل ہوئے۔ انہوں نے کہا کہ ورلڈ کپ سے قبل ٹیم اپنی کمزوریوں پر مزید محنت کرے گی۔
فائنل میں نمایاں بیٹنگ کرنے والے سمیر منہاس نے کہا کہ ٹیم کا منصوبہ پورے ٹورنامنٹ میں بے خوف کرکٹ کھیلنے کا تھا اور یہی حکمتِ عملی ٹیم کی کامیابی کی بنیاد بنی۔
واضح رہے کہ پاکستان نے آئی سی سی اکیڈمی گراؤنڈ دبئی میں کھیلے گئے انڈر 19 ایشیا کپ کے فائنل میں روایتی حریف بھارت کو 191 رنز کے بڑے مارجن سے شکست دے کر ٹائٹل اپنے نام کیا۔