پاکستان رینجرز (سندھ) اور پولیس نے اندرون سندھ کے ضلع گھوٹکی کے کراس بند خان گڑھ چوک میں اندھڑ، لاٹھانی، بکھرانی، شیخانی اور مزاری جرائم پیشہ گینگز کے خلاف مشترکہ آپریشن کیا، جس کے دوران بدنام زمانہ ڈاکو عبداللہ دشتی، ہزارہ عرف لالا شیخانی، آذان عرف چھلو سمیت 9 ڈاکو ہلاک جبکہ 27 زخمی ہوئے۔
فیلڈ مارشل عاصم منیر کو سعودی عرب کا اعلیٰ ترین کنگ عبد العزیز اعزاز
تفصیلات کے مطابق 15 دسمبر 2025 کی رات صادق آباد سے کوئٹہ جانے والی مسافر بس کو مسلح ڈاکوؤں نے اوباڑو کے قریب روکا اور 18 مسافروں کو بس سے اتار کر اغوا کر لیا۔ رینجرز اور پولیس کی بروقت کارروائی کے نتیجے میں تمام مغوی بازیاب کرائے گئے اور ڈاکوؤں کے خلاف آپریشن جاری رکھا گیا۔
ہلاک ڈاکو ہزارہ عرف لالا شیخانی اور آذان عرف چھلو پر پنجاب پولیس کی جانب سے 50، 50 لاکھ روپے کے انعامات مقرر تھے۔ آپریشن کے دوران تنویر اندھڑ، چھلو بکھرانی اور قابل شیخانی کے ٹھکانوں سے مختلف اقسام کا اسلحہ اور ایمونیشن برآمد ہوئی، جن میں 12.7 گن، ایل ایم جی، آر آر 75، 2 عدد آر پی جی 7، 4 عدد جی تھری، 4 عدد ایس ایم جی، 3 عدد 12 بور، رپیٹر، 9 ایم ایم پسٹل اور مختلف اقسام کی ایمونیشن شامل ہیں۔ اس کے علاوہ 9 موبائل فون اور ایک کرولا گاڑی بھی برآمد کی گئی۔
تمام برآمد شدہ اسلحہ و ایمونیشن، مغوی افراد اور دیگر سامان پولیس تھانہ سومیانی، تحصیل روجھان کے حوالے کر دیا گیا۔ عوام سے درخواست کی گئی ہے کہ وہ ڈاکوؤں کو پناہ دینے والے عناصر اور دیگر بااثر افراد کی نشاندہی رینجرز ہیلپ لائن یا رینجرز مددگار واٹس ایپ نمبر پر کریں، اور اپنا نام صیغہ راز میں رکھا جائے گا۔