کراچی (اسٹاف رپورٹر) — وزیراعلیٰ سندھ سید مراد علی شاہ نے داؤد یونیورسٹی آف انجینئرنگ اینڈ ٹیکنالوجی (DUET) کراچی کے 13ویں کنوکیشن سے خطاب کرتے ہوئے کہا کہ جامعہ نے گزشتہ چند برسوں میں مثالی ترقی کی ہے اور 2023 کے بعد ادارے میں حقیقی رینیسانس کا آغاز ہوا ہے۔
وزیراعلیٰ نے بتایا کہ DUET نے اپنے ہی وسائل سے 75 کروڑ روپے کی لاگت سے انفراسٹرکچر بہتر بنایا جبکہ جدید اسٹیٹ آف دی آرٹ آڈیٹوریم، اسپورٹس گراؤنڈ اور اسٹوڈنٹ ہاسٹل کی تعمیر جاری ہے۔ گلبرگ کیمپس میں جدید I&CS فیکلٹی، AVR لیبز، نئی کلاس رومز اور میٹیریل، پٹرولیم، انوائرمنٹ اور انرجی کی خصوصی لیبز بھی قائم کی جا رہی ہیں۔
وفاقی وزیر صحت مصطفیٰ کمال اور عذرا پیچوہو کی اہم ملاقات، جناح اسپتال کے معاملات حل کرنے پر اتفاق
مراد علی شاہ نے کہا کہ داؤد یونیورسٹی نے ناقابلِ برداشت مالی مشکلات سے ایک مضبوط اور مستحکم ادارے تک کا سفر شفاف انتظام اور نئے آمدنی ماڈلز کے ذریعے طے کیا۔ معیاری تعلیم، تحقیق اور انتظامی کارکردگی کی بدولت DUET نے QS ایشیا رینکنگ میں نمایاں بہتری حاصل کی، جبکہ یوتھ ڈیولپمنٹ پروگرام (YPR) کا اسکور 53 فیصد سے بڑھ کر 84.13 فیصد تک پہنچ گیا۔ اسی طرح ایس ڈی جی ٹائمز ہائر ایجوکیشن انڈیکس میں بھی اہم پیش رفت ریکارڈ کی گئی۔
وزیراعلیٰ سندھ نے کہا کہ یہ تمام کامیابیاں وائس چانسلر انجینئر پروفیسر ڈاکٹر سمرین حسین (S.I، T.I) کی مؤثر قیادت کا نتیجہ ہیں۔ ڈاکٹر سمرین کو پاکستان کی پہلی خاتون انجینئرنگ وائس چانسلر ہونے کا اعزاز حاصل ہے، وہ 50 سے زائد تحقیقی اشاعتوں اور 300 سے زیادہ علمی مقالات کی مصنفہ ہیں، جبکہ خسارے میں چلنے والی جامعہ کو سرپلس میں تبدیل کرنا ان کی غیر معمولی صلاحیتوں کا ثبوت ہے۔
مراد علی شاہ نے بتایا کہ اس سال 620 امیدواروں میں سے 413 طلبہ نے ڈگری حاصل کی، جن میں سے 66 فیصد پہلے ہی روزگار حاصل کر چکے ہیں، جبکہ مکمل ڈگری ہولڈرز کی ملازمت پذیری تقریباً 100 فیصد تک پہنچ چکی ہے۔ اس کامیابی میں مائیکرو ڈگری پروگرامز، صنعت سے روابط اور سابق طلبہ کی کوششوں نے اہم کردار ادا کیا۔
وزیراعلیٰ سندھ نے فارغ التحصیل طلبہ کو مخاطب کرتے ہوئے کہا کہ وہ جدت، دیانتداری اور خدمت کے جذبے کے ساتھ مواقعوں کی دنیا میں قدم رکھیں۔ انہوں نے والدین، اساتذہ اور عملے کی محنت کو سراہتے ہوئے کلاس آف 2025 کو دلی مبارکباد پیش کی۔