کراچی: پنجاب، سندھ اور خیبر پختونخوا کے سیلاب متاثرہ علاقوں میں پاک بحریہ کے ریسکیو اور ریلیف آپریشنز وسیع پیمانے پر جاری ہیں۔ ایمرجنسی ریسپانس ٹیمیں سیلاب سے متاثرہ شہریوں کے فوری انخلاء، تحفظ اور بنیادی سہولتوں کی فراہمی کے لیے مسلسل سرگرم عمل ہیں۔
پاکستان اور ہانگ کانگ کے درمیان قانونی تعاون کے فروغ کا معاہدہ طے
سندھ کے اضلاع کشمور، گھوٹکی، سکھر اور شکارپور میں پاک بحریہ نے متاثرین کے انخلاء کے لیے جدید ہوور کرافٹس استعمال کیے جو زمین، پانی اور دلدلی علاقوں میں مؤثر آپریشن کی صلاحیت رکھتے ہیں۔ ان اضلاع میں اب تک 4335 افراد اور 125 سے زائد مویشیوں کو محفوظ مقامات پر منتقل کیا جا چکا ہے۔
پاک بحریہ کی ٹیموں نے علی واہان، الف کچہ، بچل شاہ میانی، حاجی غلام مصطفیٰ جتوئی، سومرو گوٹھ (سکھر)، جام علی چاچڑ، کے کے بند (کشمور)، سومرو پنواری (پنو عاقل)، گھمرو گوٹھ (شکارپور) اور شنک بند (گھوٹکی) سمیت متعدد مقامات پر ریسکیو آپریشنز کیے۔ اس کے علاوہ قصور، راجن پور، ڈیرہ اسماعیل خان، میرپور خاص، سانگھڑ، سجاول، بونیر، شانگلہ اور مینگورہ میں بھی امدادی سرگرمیاں جاری ہیں۔
ریسکیو آپریشنز کے دوران متاثرہ افراد کو محفوظ مقامات پر منتقل کرنے کے ساتھ ساتھ گھریلو سامان اور کھاد کے ذخائر بھی بحفاظت پہنچائے گئے۔ پاک بحریہ کی امدادی ٹیمیں متاثرین کو راشن، طبی امداد اور ادویات بھی فراہم کر رہی ہیں۔ یہ آپریشنز مقامی سول انتظامیہ کے تعاون سے انجام دیے جا رہے ہیں تاکہ ریسکیو اور ریلیف سرگرمیوں کو زیادہ مؤثر بنایا جا سکے۔
ترجمان کے مطابق، یہ امدادی آپریشنز اس عزم کا اظہار ہیں کہ پاک بحریہ ہر مشکل گھڑی میں قوم کے ساتھ کھڑی ہے اور متاثرہ شہریوں کے تحفظ کے لیے اپنی کاوشیں بلا تعطل جاری رکھے گی۔
