لاہور (اسپورٹس ڈیسک) پاکستان کے مڈل آرڈر بلے باز آصف علی نے انٹرنیشنل کرکٹ سے ریٹائرمنٹ کا اعلان کر دیا ہے۔ 33 سالہ بیٹر نے کہا کہ پاکستان کی نمائندگی ان کی زندگی کا سب سے بڑا اعزاز رہا اور وہ ہمیشہ اس لمحے پر فخر کریں گے۔
انسداد دہشت گردی عدالت نے فرحان غنی کو عمرہ ادائیگی کے لیے بیرون ملک جانے کی اجازت دے دی
آصف علی نے اپنے کیریئر کے دوران زیادہ تر فنشر کے طور پر کھیلتے ہوئے 21 ون ڈے اور 58 ٹی ٹوئنٹی میچز کھیلے۔
سوشل میڈیا پر اپنے پیغام میں انہوں نے کہا: "پاکستان کی جرسی پہننا میری زندگی کا سب سے بڑا اعزاز رہا۔ اپنے مداحوں، ساتھی کھلاڑیوں اور کوچز کا شکر گزار ہوں جنہوں نے ہر مشکل اور آسان وقت میں میرا ساتھ دیا۔”
انہوں نے 2018 میں ویسٹ انڈیز کے خلاف ٹی ٹوئنٹی ڈیبیو کیا، اسی سال دو ماہ بعد ون ڈے انٹرنیشنل میں بھی شروعات کی۔ اس سے قبل وہ پی ایس ایل میں اسلام آباد یونائیٹڈ کی کامیابی میں اہم کردار ادا کر چکے تھے۔
ریٹائرمنٹ کے موقع پر آصف علی نے اپنی بیٹی کے انتقال کا ذکر کرتے ہوئے کہا کہ ورلڈ کپ کے دوران اس کڑے وقت میں گھر والوں اور دوستوں نے حوصلہ دیا۔
آصف علی نے مزید کہا کہ وہ انٹرنیشنل کرکٹ سے ریٹائرمنٹ کے بعد بھی ڈومیسٹک کرکٹ اور دنیا بھر کی مختلف لیگز میں کھیلتے رہیں گے۔
یاد رہے کہ آصف علی بڑے میچوں میں جارحانہ بیٹنگ کی وجہ سے شہرت رکھتے ہیں۔ وہ ایشیا کپ کے دوران افغانستان کے فرید احمد کے ساتھ آن فیلڈ جھڑپ پر آئی سی سی کے جرمانے کا بھی سامنا کر چکے ہیں۔