کراچی— پاکستان اور ترکیہ کی بحری افواج کی اسپیشل فورسز کے درمیان پہلی دو طرفہ جنگی مشق کامیابی کے ساتھ اختتام پذیر ہو گئی۔ یہ مشق دونوں برادر اسلامی ممالک کے درمیان دفاعی تعاون، باہمی ہم آہنگی، اور آپریشنل تیاری کے فروغ کی جانب ایک اہم پیش رفت قرار دی جا رہی ہے۔
مشق میں خشکی اور سمندر میں کئی تربیتی سرگرمیاں شامل تھیں، جن میں جدید ہتھیاروں کی فائرنگ، شہری علاقوں میں فوجی کارروائیاں، اور جنگی منظرناموں پر مبنی آپریشنز کی مشق شامل تھی۔
مشق کے دوران لائیو فائرنگ اور مختلف آپریشنل مظاہرے کیے گئے، جن کا مقصد ساحلی علاقوں میں مشترکہ دفاعی حکمت عملی کی تیاری اور دونوں افواج کی عملی مہارتوں کو جانچنا تھا۔
اختتامی سیشن میں جامع ڈرل کا مظاہرہ کیا گیا، جس میں خشکی اور سمندر میں خطرات سے نمٹنے کی مکمل جنگی تیاری کا عملی مظاہرہ شامل تھا۔ اس مشق نے دونوں ممالک کی اسپیشل فورسز کی حربی صلاحیتوں اور مربوط ردعمل کو مؤثر انداز میں پیش کیا۔
یہ مشق نہ صرف پاکستان اور ترکیہ کے درمیان مضبوط دفاعی تعلقات کی عکاس ہے بلکہ یہ دونوں ممالک کے اس عزم کی بھی توثیق ہے کہ وہ مشترکہ اقدامات کے ذریعے خطے میں امن، سلامتی، اور استحکام کو فروغ دیتے رہیں گے۔
