اسلام آباد میں صحافیوں سے گفتگو کرتے ہوئے سینیٹر عرفان صدیقی نے کہا کہ پی ٹی آئی کے قائم مقام چیئرمین بیرسٹر گوہر کی جانب سے مذاکرات میں شرکت نہ کرنے کا عندیہ دیا گیا ہے۔ انہوں نے واضح کیا کہ اسپیکر ایاز صادق نے میٹنگ ملتوی نہیں کی، اور مسلم لیگ ن کمیٹی میں شرکت کرے گی۔
پیکا ترمیمی بل کی منظوری پر سینیٹ میں ہنگامہ، اپوزیشن کا احتجاج، صحافیوں کا واک آؤٹ
عرفان صدیقی نے کہا کہ اگر پی ٹی آئی مذاکرات میں شامل ہوتی ہے تو حکومت ان کے مطالبات پر تراش خراش کرنے پر غور کرے گی۔ تاہم، اگر وہ مسلسل ملاقاتوں سے گریز کرتے ہیں، تو کمیٹی کی افادیت پر سوال اٹھے گا، اور حکومت کمیٹی کو تحلیل کرنے پر غور کرے گی۔
انہوں نے مزید کہا کہ پی ٹی آئی نے مذاکرات کے دوران کبھی یہ واضح نہیں کیا کہ کمیشن کی تشکیل مذاکرات کے لیے شرط ہے۔ تین ملاقاتوں میں یہ مطالبہ سامنے نہیں آیا اور ان کا یہ کہنا کہ کمیشن پہلے قائم کیا جائے، غیر منطقی ہے۔
حکومتی کمیٹی کے ترجمان نے بتایا کہ ساتوں جماعتوں نے تین طویل ملاقاتوں میں سنجیدہ مشق کی اور پی ٹی آئی کے مطالبات پر غور کیا۔ لیکن پی ٹی آئی نے ان ملاقاتوں کے دوران ٹھوس اور تحریری مطالبات پیش کرنے میں ناکامی کا مظاہرہ کیا۔
عرفان صدیقی نے کہا کہ مذاکرات کے لیے ایک سلیقہ اور اصول ہونا چاہیے، جو کہ پی ٹی آئی نے ابھی تک نہیں اپنایا۔ انہوں نے مزید کہا کہ مذاکرات کا مقصد مسائل کا حل نکالنا ہے، لیکن پی ٹی آئی کی جانب سے پیشگی شرائط اور غیر سنجیدہ رویہ مذاکراتی عمل کو متاثر کر رہا ہے۔