تشکر نیوز: کراچی پولیس چیف جاوید عالم اوڈھو نے سندھ بوائز اسکاوٹس آڈیٹوریم میں ڈی آئی جی ایڈمن، ڈی آئی جی سی آئی اے، ڈی آئی جی ٹریفک، زونل ڈی آئی جیز، ڈی آئی جی انویسٹیگیشن، ضلعی ایس ایس پیز، ایس پیز انویسٹیگیشن، ایس ایس پی اے وی ایل سی، ایس آئی یو، اے وی سی سی، ایس ایچ اوز، ایس آئی اوز اور ٹریفک ایس اوز کے ساتھ ایک خصوصی اجلاس میں خطاب کیا۔
اسٹیٹ بینک کی بینکوں کو کم از کم 5 میگا پکسل سی سی ٹی وی کیمرے نصب کرنے کی ہدایت
اجلاس میں ایڈیشنل آئی جی کراچی نے افسران کی کارکردگی کو سراہتے ہوئے جرائم اور دہشت گردی کے خلاف مؤثر حکمت عملی تیار کرنے کی ہدایت کی۔ پولیس چیف نے چائنیز شہریوں کی سیکیورٹی کو ہر ممکن طور پر فول پروف بنانے کے احکامات بھی دیے اور سینئر افسران کو سیکیورٹی انتظامات کا مکمل جائزہ لینے کی ہدایت کی تاکہ موجودہ حالات میں مؤثر اقدامات کیے جا سکیں۔
اجلاس میں شہر میں کرائم کے خاتمے کے لیے کومبنگ آپریشنز، پیٹرولنگ میں اضافہ اور دیگر آپریشنل کارروائیوں کے احکامات بھی جاری کیے گئے۔ افسران کو عوامی مسائل سے آگاہی حاصل کرنے کے لیے کھلی کچہریاں کرنے اور عوام کی پولیس تک رسائی کو ممکن بنانے کے اقدامات کی بھی ہدایت کی گئی۔
کراچی کے اندرونی اور خارجی راستوں پر اسنیپ چیکنگ اور ناکہ بندی میں اضافے اور انٹیلیجنس نیٹ ورک کو متحرک کرنے کے احکامات بھی دیے گئے۔ مزید برآں، منشیات کے خاتمے، گاڑیوں کی چوری اور دیگر منظم جرائم کے خلاف سخت اقدامات عمل میں لانے کی ضرورت پر زور دیا گیا۔
تفتیشی افسران کو ہدایت کی گئی کہ وہ تفتیشی امور میں جدت لائیں اور ملزمان کی فوری گرفتاری کو یقینی بنائیں، تاکہ ان کی شناخت پریڈ فوری طور پر کی جا سکے اور انہیں سخت سے سخت سزائیں دلائی جا سکیں۔
ٹریفک پولیس کو شہر میں ٹریفک کی روانی کو بحال رکھنے اور ٹریفک قوانین کے اطلاق کو یقینی بنانے کی ہدایت کی گئی۔
اختتام پر، ایڈیشنل آئی جی نے کراچی پولیس کی جرائم کے خاتمے کے لیے پیش کردہ قربانیوں کو خراج تحسین پیش کیا، اور تمام افسران کو ان کی کوششوں میں کامیابی کی دعا دی۔ یہ اجلاس پولیس کی کارکردگی کو بہتر بنانے اور شہریوں کے تحفظ کو یقینی بنانے کے لیے ایک اہم اقدام سمجھا جاتا ہے۔