گوادَر: انسدادِ منشیات کے شعبے میں ایک تاریخی کامیابی کے طور پر، اینٹی نارکوٹکس فورس (اے این ایف) ڈیٹ گوادَر نے پہلی بار سمندری انٹیلی جنس بیسڈ کارروائی انجام دی، جس کے دوران مکران کوسٹل لائن کے قریب پڈی زر کے سمندر میں منشیات سے بھری ایک تیز رفتار کشتی کو روک کر دو اہم کارندوں کو گرفتار کر لیا گیا۔
کارروائی کے دوران ملزمان کے قبضے سے 300 کلوگرام اعلیٰ معیار کی چرس برآمد ہوئی۔ ابتدائی تفتیش کے مطابق یہ نیٹ ورک پاکستان کے مغربی ساحل سے یمن، خلیجی ریاستوں اور افریقی ممالک تک منشیات اسمگل کرنے میں ملوث تھا۔
اے این ایف نے گرفتار شدگان، برآمد شدہ منشیات اور ضبط شدہ کشتی کو مزید قانونی کارروائی کے لیے پولیس اسٹیشن منتقل کر دیا ہے۔ حکام کے مطابق یہ کارروائی علاقائی سطح پر منشیات اسمگلنگ کے چیلنج کی نشاندہی کرتی ہے، کیونکہ پاکستان کو سمندری راستوں کے ذریعے بین الاقوامی اسمگلنگ نیٹ ورکس کی جانب سے بطور ٹرانزٹ استعمال کیا جا رہا ہے۔
محدود وسائل کے باوجود، اے این ایف نے سمندری نگرانی، انٹیلی جنس جمع آوری اور مؤثر آپریشنل حکمت عملی کے ذریعے منشیات کے پھیلاؤ کو روکنے اور پاکستان کی ساکھ کے تحفظ میں اہم کردار ادا کیا ہے۔
