اسلام آباد میں باخبر ذرائع نے وزیراعظم شہباز شریف کو تبدیل کرنے یا کسی مبینہ ’’ونڈر بوائے‘‘ کی تلاش سے متعلق خبروں کو سختی سے مسترد کر دیا ہے۔ ذرائع کے مطابق ایسی قیاس آرائیاں حقیقت پر مبنی نہیں اور نہ ہی کسی بڑے منصوبے کے تحت وزیراعظم کی تبدیلی زیرِ غور ہے۔
چکوال میں مسافر بس کھائی میں گر گئی 5 افراد جاں بحق 27 زخمی
ذرائع نے واضح کیا کہ وزیراعظم شہباز شریف اور فیلڈ مارشل کے درمیان تعلقات، باہمی اعتماد اور احترام پہلے کی طرح مضبوط اور شاندار ہیں، اور ان کے درمیان کام کرنے کے تعلق یا مفاہمت میں کسی قسم کی تبدیلی نہیں آئی۔ اس حوالے سے براہِ راست سوال پر ایک اہم سرکاری ذریعے نے کہا کہ دونوں کے تعلقات ’’انتہائی شاندار‘‘ ہیں۔
ذرائع نے اس تاثر کو بھی رد کر دیا کہ کسی گرینڈ پلان کے تحت موجودہ قیادت کے متبادل کے طور پر کسی غیر معمولی شخصیت کی ضرورت محسوس کی جا رہی ہے۔ ان کا کہنا تھا کہ وزیراعظم کے منصب یا عسکری قیادت کے ساتھ ان کے ورکنگ ریلیشن شپ کو کمزور کرنے کا سوال ہی پیدا نہیں ہوتا۔
یہ بحث حالیہ دنوں میں اس وقت شدت اختیار کر گئی جب ایک سینئر صحافی اور کالم نگار کے کالم میں ’’ونڈر بوائے‘‘ کی ضرورت کا تذکرہ سامنے آیا، جس کے بعد سوشل میڈیا اور مرکزی میڈیا پر مختلف قیاس آرائیاں کی جانے لگیں۔ تاہم باوثوق ذرائع کے مطابق ان تمام اندازوں اور تبصروں کی کوئی ٹھوس بنیاد موجود نہیں۔
ذرائع نے مزید کہا کہ ملک کے موجودہ سیاسی اور انتظامی معاملات معمول کے مطابق چل رہے ہیں اور وزیراعظم شہباز شریف اپنی ذمہ داریاں پوری طرح ادا کر رہے ہیں، جبکہ ریاستی اداروں کے درمیان ہم آہنگی برقرار ہے۔