کمشنر کراچی کی ہدایت پر شہر بھر میں تجاوزات کے خلاف کریک ڈاؤن، 338 دکانیں سیل، 91 ہوٹلز بھی شامل

کراچی (اسٹاف رپورٹر): کمشنر کراچی سید حسن نقوی کی ہدایت پر شہر بھر میں تجاوزات کے خلاف جامع کارروائی شروع کی گئی، جس کے نتیجے میں 338 دکانیں سیل کی گئیں، جن میں 91 ہوٹلز بھی شامل ہیں، اور متعدد افراد کو گرفتار کیا گیا۔

سینئر ویڈیو جرنلسٹس کا کراچی پریس کلب کی نو منتخب کابینہ کو مبارکباد

کمشنر کی جانب سے جاری دو روزہ انکروچمنٹ آپریشن رپورٹ کے مطابق سڑکوں اور فٹ پاتھوں پر غیر قانونی قبضہ کرنے والوں کے خلاف سخت کارروائی کی گئی۔ سیل کی گئی دکانوں کے باہر قائم ٹھیلے، پتھارے اور دیگر غیر قانونی ساختیں بھی ضبط کر لی گئیں۔

ضلع وار تفصیلات کے مطابق ضلع جنوبی میں سب سے زیادہ 284 دکانیں سیل کی گئیں، جبکہ ضلع شرقی میں 23، ضلع وسطی میں 14، کیماڑی میں 3، کورنگی میں 11، ملیر میں 1 اور ضلع غربی میں 2 دکانیں سیل کی گئیں۔

کمشنر سید حسن نقوی نے تمام ڈپٹی اور اسسٹنٹ کمشنرز کی کارکردگی پر اطمینان کا اظہار کیا اور کہا کہ دکانیں ایس او پیز کی خلاف ورزی پر سیل کی گئیں۔ انہوں نے بتایا کہ سیل کی جانے کے باوجود بعض دکانوں کے باہر دوبارہ تجاوزات قائم کی گئی تھیں۔

انہوں نے کہا، "تجاوزات مافیا نے سڑکوں اور فٹ پاتھوں کو اپنی ذاتی ملکیت سمجھ لیا ہے، جسے کسی صورت برداشت نہیں کیا جائے گا۔”

کمشنر نے واضح کیا کہ تجاوزات مافیا کے خلاف سخت کارروائی جاری رہے گی اور یہ آپریشن بلا تعطل اس وقت تک جاری رہے گا جب تک کہ تمام تجاوزات مکمل طور پر ختم نہ ہو جائیں۔ انہوں نے مزید کہا کہ دکانداروں کو کئی بار خود سے تجاوزات ہٹانے کی تنبیہ دی جا چکی تھی، لیکن عملدرآمد نہ ہونے کی وجہ سے سخت نفاذ ناگزیر ہو گیا۔