چیمپیئنز لیگ میں منگل کو کھیلے گئے میچ میں بوروسیا ڈورٹمنڈ نے 10 رکنی ولاریال کو 0-4 سے مات دے کر اکتوبر کے بعد اپنی پہلی فتح حاصل کرلی۔ یہ کامیابی ٹیم کو پانچ پوائنٹس کے ساتھ گروپ ٹیبل میں چوتھے نمبر تک لے آئی۔
بابری مسجد کی جگہ رام مندر کی تعمیر پر پاکستان کا شدید ردعمل
ڈورٹمنڈ کے گنی نژاد اسٹرائیکر سیرہو گیراسی، جو گزشتہ سیزن کے مشترکہ ٹاپ اسکورر رہے تھے، نے حالیہ نو میچوں میں صرف ایک گول کیا تھا، تاہم اس مقابلے میں وہ شاندار فارم میں دکھائی دیے اور ہاف ٹائم سے چند لمحے قبل پہلا گول اسکور کیا۔
میچ کے دوسرے ہاف کے آغاز میں ولاریال کے کپتان جوان فوئتھ کو اس وقت ریڈ کارڈ دکھا کر میدان بدر کر دیا گیا جب وی اے آر کے ذریعے تصدیق ہوئی کہ انہوں نے کریم اڈیمی کی گول کی جانب جاتی شاٹ کو ہاتھ سے روکا تھا۔
گیراسی کی پنالٹی کو ولاریال کے گول کیپر لویس جونیئر نے تو روک لیا، لیکن گیراسی نے ریباؤنڈ پر گیند جال میں پہنچا کر ٹیم کی برتری دگنی کر دی۔
ڈورٹمنڈ کی برتری میں اضافہ کرتے ہوئے کریم اڈیمی نے نصف گھنٹے سے کچھ پہلے گول کیا، جو جولین برانڈٹ کی بہترین بیک ہیل سے تیار ہوا تھا۔ اڈیمی نے آرسنل کے سابق کھلاڑی تھامس پارٹی پر پریشر ڈالا، جس کا نتیجہ ڈورٹمنڈ کے تیسرے گول کی صورت میں نکلا۔
میچ کے آخری لمحات میں اڈیمی نے ایک اور پنالٹی حاصل کی، تاہم متبادل اسٹرائیکر فابیو سلوا نے اپنی شاٹ کراس بار سے اوپر مار دی۔
اسٹاپیج ٹائم میں ڈینیئل سونسن نے پاسکل گراس کے کراس پر شاندار ہیڈر کے ذریعے چوتھا گول اسکور کیا، جسے دائیں جانب سے جاب بیلنگھم کے طویل پاس نے خوبصورت انداز میں ترتیب دیا تھا۔
میچ کے بعد ڈورٹمنڈ کے کپتان نیکو شلوٹربیک نے اعتراف کیا کہ ریڈ کارڈ نے ان کی ٹیم کو فائدہ پہنچایا، تاہم انہوں نے کہا کہ "ہم وقفے کے بعد بہت بہتر انداز میں واپس آئے، یہی جیت کی اصل وجہ تھی۔”
شلوٹربیک نے گیراسی کی واپسی پر خوشی کا اظہار کرتے ہوئے کہا کہ "گزشتہ ہفتوں میں اس کے لیے وقت مشکل رہا، مگر آج اس نے ٹیم کے لیے سب کچھ دے دیا۔”
گیراسی نے بھی اس فتح کو ٹیم کے لیے "بہت اہم” قرار دیا اور کہا کہ اگر ہم دنیا کی بہترین ٹیم بننا چاہتے ہیں تو ہمیں اسی طرح تسلسل کے ساتھ کھیلنا ہوگا۔
دوسری جانب، اس شکست نے ولاریال کی یورپی مہم کو مزید مشکلات میں مبتلا کر دیا ہے۔ ٹیم اب تک چیمپیئنز لیگ کے پانچ میچوں سے صرف ایک پوائنٹ حاصل کر سکی ہے، حالانکہ لا لیگا میں وہ تیسرے نمبر پر موجود ہے۔
ولاریال کے منیجر مارسیلینو نے کہا کہ "چیمپیئنز لیگ کے اس مرحلے پر چھوٹی غلطیاں بڑا فرق پیدا کرتی ہیں، اور بدقسمتی سے یہ چیزیں ہمارے خلاف جا رہی ہیں۔”