کراچی (اسٹاف رپورٹر) وزیرِ داخلہ سندھ ضیاء الحسن لنجار نے کہا ہے کہ کراچی میں نافذ کیا جانے والا ای-چالان نظام اسی شخص کے خلاف چلے گا جس کے نام گاڑی کی رجسٹریشن درج ہوگی۔ جیو نیوز کے پروگرام "آج شاہ زیب خانزادہ کے ساتھ” میں گفتگو کرتے ہوئے وزیرِ داخلہ نے بتایا کہ جہاں جہاں ٹریفک سگنلز ہوں گے وہاں ای-چالان کا عمل ہوگا اور سگنلز کے ساتھ نصب کیمرے ایک ماہ کے اندر فعال کر دیے جائیں گے۔
ضیاء لنجار نے کہا کہ ایک تا ڈیڑھ سال کے اندر کراچی شہر میں بارہ ہزار کیمروں کی تنصیب مکمل کر لی جائے گی۔ اُن کے مطابق گزشتہ روز ہی شہر میں دو ہزار چھ سو (2600) چالان کیے گئے، جو کہ ایک بڑے شہر کے لیے معمولی تعداد نہیں۔
وزیرِ داخلہ نے موٹرسائیکل کے حوالے سے کہا کہ دو قسم کے چالان نافذ کیے جائیں گے اور گاڑی بیچنے کے بعد بھی رجسٹریشن نہ کروانا جرم ہوگا، اسی صورت میں چالان سابقہ مالک کو بھی جائے گا۔ انہوں نے بتایا کہ تقریباً 10 ہزار ٹریلرز اور ٹینکروں کو رجسٹر کروایا گیا اور ان میں ٹرَیکرز نصب کیے گئے ہیں، جو ای-چالان نظام سے منسلک ہیں — جب یہ ٹریلر یا ٹینکر رفتار 30 کلومیٹر فی گھنٹہ سے بڑھائیں گے تو خود کار طریقے سے چالان کا نوٹس جاری ہو گا۔
وزیرِ داخلہ نے کہا کہ موجودہ نظام فینسی نمبر پلیٹس کی شناخت بھی کر سکتا ہے جبکہ ٹریفک پولیس کے ساتھ مل کر مختلف علاقوں میں ڈرائیونگ لائسنس ٹریننگ سینٹرز قائم کیے جا رہے ہیں تاکہ بہتر اور محفوظ ڈرائیونگ کو فروغ دیا جا سکے۔