اسپین نے منگل کو کھیلے گئے میچ میں شاندار کارکردگی دکھاتے ہوئے بلغاریہ کو 0-4 سے شکست دے دی اور 2026 فیفا ورلڈ کپ کے لیے کوالیفائی کرنے کے ایک اور مرحلے کے قریب پہنچ گیا۔
ہیری کین کے دو گول انگلینڈ نے لٹویا کو 0-5 سے ہرا کر ورلڈ کپ 2026 کے لیے کوالیفائی کرلیا
لوئیس ڈی لا فوئنٹے کی زیرِ قیادت ٹیم نے آغاز سے اختتام تک مکمل غلبہ قائم رکھا۔ اسپین کی جانب سے میکل میرینو کے دو گول، اتانس چیرنیف کے خودکش گول اور میکل اویارزابال کی پنالٹی کی بدولت ٹیم نے قیمتی تین پوائنٹس حاصل کیے۔
اس کامیابی کے ساتھ اسپین نے اپنے ابتدائی چاروں میچ جیت کر گروپ E میں ترکی پر تین پوائنٹس کی برتری حاصل کرلی ہے۔ ٹیم نے اب تک 15 گول کیے ہیں جبکہ ایک بھی گول اپنے خلاف نہیں ہونے دیا۔
میچ کے بعد گفتگو کرتے ہوئے میکل میرینو نے کہا، “میں اپنی فٹنس اور اسکورنگ پر محنت کر رہا تھا اور آج اس کا صلہ ملا۔ ٹیم نے پورے میچ میں حاوی رہ کر بہترین فٹبال کھیلا، یہی اصل کامیابی ہے۔”
اسپین کو متعدد اہم کھلاڑیوں کی خدمات حاصل نہیں تھیں، جن میں لامین یامل، روڈری ہرنینڈز اور نیکو ولیمز شامل تھے، لیکن اس کے باوجود ٹیم نے بلغاریہ کے خلاف یکطرفہ مقابلہ پیش کیا۔
پہلے ہاف میں اسپین نے برتری حاصل کی جب پیڈری کی شاندار کراس پر رابن لی نارمنڈ کے ہیڈر سے میرینو نے پہلا گول اسکور کیا۔ دوسرے ہاف میں میرینو نے الیخاندرو گریمالڈو کے کراس پر دوسرا گول کر کے اسکور 0-2 کردیا۔
میچ کے 79ویں منٹ میں بلغاریہ کے مدافع اتانس چیرنیف نے ایلکس گارسیا کے کراس کو روکنے کی کوشش میں گیند اپنے ہی جال میں ڈال دی۔ اختتامی لمحات میں میرینو نے پنالٹی حاصل کی، جسے اویارزابال نے گول میں تبدیل کر کے میچ 0-4 سے ختم کیا۔
اس کامیابی کے ساتھ اسپین نے مسلسل 29 مسابقتی میچز بغیر شکست کے مکمل کر کے 2010–2013 کے ویسینٹے ڈیل بوسکے کے قائم کردہ قومی ریکارڈ کی برابری کرلی۔
میچ کے بعد کوچ لوئیس ڈی لا فوئنٹے نے کہا، “میں کھلاڑیوں کو مبارکباد دیتا ہوں۔ ہم جیت رہے ہیں مگر ہمیں رکنا نہیں — ہمارا ہدف صرف اگلا میچ نہیں بلکہ ورلڈ کپ جیتنا ہے۔”