کراچی، 17 مارچ 2026ء: ڈسٹرکٹ سینٹرل ویسٹ زون کراچی کے علاقے خواجہ اجمیر نگری میں پولیس مقابلے کے دوران زخمی حالت میں گرفتار ہونے والے ملزم اظہار ولد محمد نور کے ماضی کا مکمل کریمنل ریکارڈ سامنے آ گیا ہے، جس نے اس کے خطرناک جرائم پیشہ ہونے کی تصدیق کر دی ہے۔
کراچی: اے پلس منشیات اور گٹکا/ماوا مافیا کے خلاف سندھ پولیس کی کریک ڈاؤن کارروائیاں جاری
پولیس حکام کے مطابق ملزم ایک عادی جرائم پیشہ فرد ہے جو ماضی میں اسٹریٹ کرائم، ڈکیتی، اسلحہ رکھنے اور پولیس پر حملے جیسے سنگین جرائم میں ملوث رہا ہے۔ ابتدائی تفتیش کے دوران یہ بات سامنے آئی ہے کہ ملزم کے خلاف کراچی کے مختلف تھانوں میں متعدد مقدمات درج ہیں، جن میں سرجانی اور سرسید تھانے سرفہرست ہیں۔
پولیس ریکارڈ کے مطابق ملزم کے خلاف سال 2022 سے 2024 تک مختلف نوعیت کے مقدمات درج کیے گئے، جن میں اقدام قتل، مزاحمت برائے پولیس، غیر قانونی اسلحہ رکھنے، چوری اور ڈکیتی جیسے جرائم شامل ہیں۔ ان مقدمات میں انسداد دہشتگردی ایکٹ کی دفعات بھی شامل ہیں، جو ملزم کے جرائم کی سنگینی کو ظاہر کرتی ہیں۔
پولیس کا کہنا ہے کہ ملزم اسٹریٹ کرائم کی متعدد وارداتوں میں براہ راست ملوث رہا ہے اور شہریوں سے لوٹ مار کی کئی شکایات اس کے خلاف درج ہیں۔ پولیس مقابلے کے دوران اس کے دیگر ساتھی فرار ہونے میں کامیاب ہو گئے، جن کی گرفتاری کے لیے مختلف علاقوں میں چھاپے مارے جا رہے ہیں۔
ایس ایس پی ڈسٹرکٹ سینٹرل، ڈاکٹر محمد عمران خان کے مطابق ملزم سے مزید تفتیش جاری ہے اور اس کے نیٹ ورک، سہولت کاروں اور دیگر ساتھیوں کے بارے میں معلومات حاصل کی جا رہی ہیں۔ انہوں نے واضح کیا کہ شہر میں امن و امان کے قیام کے لیے جرائم پیشہ عناصر کے خلاف بلاامتیاز کارروائیاں جاری رہیں گی۔
پولیس حکام کا مزید کہنا ہے کہ شہریوں کے تحفظ کو یقینی بنانے کے لیے اسٹریٹ کرائم میں ملوث عناصر کے خلاف کریک ڈاؤن مزید تیز کیا جا رہا ہے اور کسی بھی جرائم پیشہ گروہ کو قانون سے بالاتر نہیں ہونے دیا جائے گا۔