کراچی (اسٹاف رپورٹر) — عالمی یومِ قلب 2025 کے موقع پر قومی ادارہ برائے امراضِ قلب (این آئی سی وی ڈی) نے کراچی میٹروپولیٹن کارپوریشن (کے ایم سی) کے اشتراک سے فریئر ہال میں فیملی ہیلتھ فیسٹ کا انعقاد کیا، جس کی نمایاں جھلک فریئر ہال اور این آئی سی وی ڈی کی عمارت کو سرخ روشنیوں سے منور کرنا تھا۔
مودی کے ٹویٹ پر محسن نقوی کا کرارا جواب، کھیل کو سیاست سے آلودہ نہ کریں
تقریب میں میئر کراچی بیرسٹر مرتضیٰ وہاب، ایگزیکٹو ڈائریکٹر این آئی سی وی ڈی پروفیسر طاہر صغیر، معروف گلوکار و سماجی کارکن شہزاد رائے اور پروفیسر خاور عباس کاظمی نے باضابطہ طور پر سرخ روشنی روشن کی۔
عالمی تھیم “ڈونٹ مِس اے بیٹ” کے تحت عوام کو صحت مند طرزِ زندگی، احتیاطی تدابیر اور باقاعدہ طبی معائنے اپنانے کا پیغام دیا گیا۔ اس موقع پر مفت طبی معائنے، آگاہی اسٹالز، بچوں کی سرگرمیاں اور موسیقی کے پروگرام بھی پیش کیے گئے۔
اپنے خطاب میں میئر کراچی مرتضیٰ وہاب نے کہا کہ دل کی صحت کے لیے اجتماعی کوششوں اور صحت مند عادات کو اپنانا نہایت ضروری ہے۔ پروفیسر طاہر صغیر نے بتایا کہ این آئی سی وی ڈی عالمی معیار کی کارڈیک سہولیات بالکل مفت فراہم کر رہا ہے اور ادارے نے حال ہی میں 1000 کارڈیک ایم آر آئی پروسیجرز مکمل کیے ہیں۔
شہزاد رائے نے نہ صرف خطاب کیا بلکہ خصوصی موسیقی کا پروگرام بھی پیش کیا، جبکہ پروفیسر خاور عباس کاظمی نے متوازن غذا، ورزش اور باقاعدہ چیک اپ کی اہمیت پر زور دیا۔
فیملی ہیلتھ فیسٹ میں عوام کی بڑی تعداد نے شرکت کی، جس نے دل کی بیماریوں کے خلاف اجتماعی عزم کو اجاگر کیا۔