سیویل کے لا کارٹوجا اسٹیڈیم میں ہفتے کے روز ایک دل دہلا دینے والے مقابلے میں جولس کونڈے کے اضافی وقت کے آخری لمحات میں کیے گئے گول کی بدولت بارسلونا نے سخت حریف ریال میڈرڈ کو 3-2 سے شکست دے کر کوپا ڈیل رے کا 32واں ٹائٹل اپنے نام کر لیا۔
انٹر کی شکست، ناپولی کی فتح سیری اے میں زبردست اتار چڑھاؤ
فرانسیسی محافظ کونڈے نے 116ویں منٹ میں 25 گز کی دوری سے نیچے کونے میں شاندار اسٹرائیک لگا کر بارسا کو یادگار فتح دلائی۔ اس کامیابی نے بارسلونا کے ریکارڈ میں ایک اور ہسپانوی کپ کا اضافہ کر دیا اور نئے کوچ ہانسی فلک کے لیے بھی پہلا بڑا اعزاز ثابت ہوا۔
میچ کے اختتام پر ریال میڈرڈ کو مزید نقصان اس وقت اٹھانا پڑا جب متبادل کھلاڑی انتونیو روڈیگر اور لوکاس وازکیز کو بینچ پر موجودگی کے دوران غیر مناسب رویے پر ریڈ کارڈ دکھایا گیا، جبکہ جوڈ بیلنگھم کو بھی میچ کے بعد سرخ کارڈ کا سامنا کرنا پڑا۔
بارسلونا کے لیے پہلا گول پیڈری نے 28ویں منٹ میں شاندار کرلنگ شاٹ کے ذریعے کیا، جس نے انہیں ابتدائی برتری دلائی۔ تاہم، دوسرے ہاف میں ریال نے واپسی کی، جب کیلیان ایمباپے، جو مکمل فٹ نہیں تھے، بینچ سے آ کر 70ویں منٹ میں فری کک کے ذریعے اسکور برابر کر دیا۔
چند منٹ بعد، آوریلین چواؤمینی نے ایک کارنر سے زبردست ہیڈر کے ذریعے ریال کو برتری دلائی، لیکن فیران ٹوریس نے 84ویں منٹ میں جوابی حملہ کرتے ہوئے میچ کو ایک بار پھر برابر کر دیا اور مقابلہ اضافی وقت میں چلا گیا۔
ایسا لگ رہا تھا کہ فائنل پنالٹی شوٹ آؤٹ میں جائے گا، مگر جولس کونڈے نے فیصلہ کن لمحے میں گول کر کے بارسلونا کو شاندار کامیابی دلائی۔
بارسلونا کے اسٹار فیران ٹوریس، جو میچ کے بہترین کھلاڑی قرار پائے، نے کہا:
"یہ شائقین کے لیے ایک تحفہ ہے۔ ہم اس لمحے سے لطف اندوز ہوں گے لیکن زیادہ نہیں، کیونکہ چند دنوں میں چیمپئنز لیگ کے سیمی فائنلز ہیں۔ یہ سب سے جسمانی طور پر سخت میچ تھا جو میں نے کھیلا، لیکن ہماری ٹیم کبھی ہار نہیں مانتی۔”
فائنل میں ریفری کے فیصلوں پر بھی خاصی گرما گرمی رہی، جس میں ایک متنازعہ پنالٹی کال کو وی اے آر کی مدد سے الٹ دیا گیا۔ اس کے باوجود، بارسلونا نے بہترین انداز میں مقابلہ ختم کر کے مداحوں کو خوشی کا بہترین موقع فراہم کیا۔
اب بارسا لا لیگا اور چیمپئنز لیگ کے ٹائٹلز کے لیے بھی سنجیدہ دعوے دار ہے، جبکہ ریال میڈرڈ کے پاس اب صرف لا لیگا کا سہارا بچا ہے۔