رنویر سنگھ اور اکشے کھنہ کی بلاک بسٹر فلم دھرندھر نہ صرف اپنی مضبوط کہانی اور شاندار اداکاری کے باعث خبروں کی زینت بنی ہوئی ہے بلکہ اس کی شوٹنگ لوکیشنز بھی شائقین کے لیے طویل عرصے تک ایک معمہ رہی ہیں۔
ٹرمپ کا دعویٰ: فوجی دھمکیوں کے بعد ایران نے مذاکرات کے لیے رابطہ کر لیا
ہدایت کار آدتیہ دھر کی اس میگا بجٹ فلم نے محض 35 دنوں میں دنیا بھر سے 1,233 کروڑ روپے کا بزنس کر کے باکس آفس پر تاریخ رقم کر دی، حالانکہ خلیجی ممالک میں فلم پر پابندی عائد ہے۔
فلم کی شوٹنگ کا آغاز جولائی 2024 میں بنکاک، تھائی لینڈ سے ہوا، جہاں پاکستانی شہری علاقوں کی عکاسی کے لیے خصوصی سیٹس تیار کیے گئے۔ رپورٹس کے مطابق بنکاک میں سرویلنس اور ہائی اوکٹین چیز سیکوئنس فلمائے گئے، جبکہ سیٹس کو اس مہارت سے ڈیزائن کیا گیا کہ وہ پاکستان کے مختلف علاقوں سے مشابہ نظر آئیں اور کہانی کا سسپنس برقرار رہے۔
ناظرین کے لیے چونکا دینے والا انکشاف یہ ہے کہ فلم میں دکھایا گیا لیاری اور کراچی کا ساحلی ماحول درحقیقت ممبئی کے مادھ آئی لینڈ میں تخلیق کیا گیا۔ تنگ گلیاں، عمارتوں کی ساخت اور مخصوص کیمرہ اینگلز نے لیاری کا ایسا حقیقی تاثر دیا کہ حقیقت اور فلمی مناظر میں فرق کرنا مشکل ہو گیا۔
فلم کے متعدد اہم اندرونی مناظر فروری 2025 میں فلمستان اسٹوڈیوز میں شوٹ کیے گئے، جو فلم کا مرکزی پروڈکشن بیس رہے۔ اسی طرح ایکشن اور ٹرانزیشن سینز کے لیے ڈومبیولی کے منکولو برج کو بغیر بڑی تبدیلی کے استعمال کیا گیا، جہاں انڈسٹریل ماحول نے چیز سیکوئنس کو مزید حقیقت کے قریب بنا دیا۔
پنجاب کے شہر امرتسر میں گولڈن ٹیمپل کے اطراف جذباتی مناظر نہایت احترام اور احتیاط کے ساتھ فلمائے گئے، جبکہ لدھیانہ کے کھیڑا گاؤں کو پاکستان کے ایک دیہی علاقے میں تبدیل کر کے یادوں اور جذبات سے بھرپور مناظر عکس بند کیے گئے۔
فلم کا سب سے مشکل مرحلہ لداخ میں پیش آیا، جہاں اگست 2025 میں سخت موسمی حالات اور بلند پہاڑی علاقوں کے باوجود شوٹنگ مکمل کی گئی۔ پتھر صاحب جیسے سرد اور ویران مقامات نے فلم کی کہانی میں تنہائی، جدوجہد اور خطرے کے احساس کو مزید گہرا کر دیا۔
دلچسپ بات یہ ہے کہ فلم کے سنجیدہ اور سنسنی خیز ماحول کے برعکس رنگ اور توانائی سے بھرپور گانے کی شوٹنگ ممبئی میں پارلے کی گولڈن ٹوبیکو فیکٹری میں کی گئی، جس نے فلم میں ایک مختلف تاثر کا اضافہ کیا۔