لکی مروت/بنوں: خیبرپختونخوا کے ضلع لکی مروت کے علاقے سرائے نورنگ میں اتوار کے روز دہشت گردوں کی فائرنگ سے ٹریفک پولیس کے تین اہلکار شہید ہو گئے۔ پولیس کے مطابق نامعلوم موٹر سائیکل سوار حملہ آوروں نے دل بیگو خیل کے قریب ڈیوٹی پر مامور ٹریفک اہلکاروں کو نشانہ بنایا اور فرار ہو گئے۔
کیماڑی میں چار افراد کے بہیمانہ قتل کا معمہ حل، مرکزی ملزم گرفتار، اعترافِ جرم
ضلع پولیس افسر کے ترجمان قدرت اللہ نے بتایا کہ فائرنگ کے نتیجے میں تینوں اہلکار موقع پر ہی شہید ہو گئے۔ شہداء میں ٹکٹنگ آفیسر انچارج جلال خان جبکہ دیگر دو اہلکار عزیز اللہ اور عبداللہ شامل ہیں۔ لاشوں کو نورنگ اسپتال منتقل کر دیا گیا ہے جبکہ پولیس نے علاقے میں سرچ آپریشن شروع کر دیا ہے۔
دوسری جانب ضلع بنوں کے علاقے کشفی خیل میں بھی نامعلوم مسلح افراد کی فائرنگ سے ایک پولیس کانسٹیبل شہید ہو گیا۔ بنوں پولیس کے ترجمان آصف حسن کے مطابق شہید کانسٹیبل رشید خان اتوار کی صبح گھر سے ڈیوٹی کے لیے روانہ ہو رہے تھے کہ موٹر سائیکل پر سوار حملہ آوروں نے ان پر فائرنگ کر دی۔
واقعے کے بعد پولیس کی بھاری نفری موقع پر پہنچ گئی، علاقے کو گھیرے میں لے کر شواہد اکٹھے کیے گئے جبکہ حملہ آوروں کی گرفتاری کے لیے سرچ آپریشن جاری ہے۔ پولیس حکام کے مطابق دہشت گردی کے ان واقعات میں ملوث عناصر کو جلد قانون کے کٹہرے میں لایا جائے گا۔