پاک فوج کے شعبہ تعلقات عامہ (آئی ایس پی آر) نے بتایا ہے کہ برف ہٹانے کے آپریشن کے دوران کیپٹن اسمد کی زیر نگرانی کام کرتے ہوئے تین افراد جان کی بازی ہار گئے۔ حادثہ 3 جنوری کی رات دو بجے پیش آیا، جب برف کا بڑا تودہ آپریشن کے مقام پر گر گیا۔
شہداء میں کیپٹن اسمد، سپاہی رضوان اور مشین آپریٹر عیسٰی شامل ہیں۔ آئی ایس پی آر کے مطابق کیپٹن اسمد 28 سالہ تھے اور لاہور سے تعلق رکھتے تھے، جبکہ سپاہی رضوان اٹک اور مشین آپریٹر عیسٰی استور سے تعلق رکھتے تھے۔
آئی ایس پی آر نے بتایا کہ سخت کوششوں کے بعد تینوں افراد کو تودے کے نیچے سے نکالا گیا، لیکن وہ شدید زخمی حالت میں تھے اور جان کی بازی ہار گئے۔
شعبہ تعلقات عامہ کے مطابق یہ شہداء خراب موسم میں فورسز کی آپریشنل نقل و حرکت کو یقینی بنانے کے دوران اپنی جان کی قربانی دے گئے۔
پاک فوج نے شہداء کے اہل خانہ سے تعزیت اور ہمدردی کا اظہار کیا اور ان کے قربانی کو ملک و قوم کے لیے اعزاز قرار دیا۔