وزیراعظم شہباز شریف آذربائیجان کے صدر الہام علیوف کی دعوت پر باکو میں منعقدہ یومِ فتح کی تقریبات میں شرکت کے لیے پہنچ گئے۔ ان کے ہمراہ نائب وزیراعظم اسحاق ڈار، وفاقی وزیر عطا تارڑ اور دیگر اعلیٰ حکومتی شخصیات بھی موجود ہیں۔
سلامتی کونسل میں پاکستان کا بھارت پر الزام سندھ طاس معاہدہ معطل کرنا عالمی قوانین کی سنگین خلاف ورزی ہے
سرکاری خبر رساں ادارے اے پی پی کے مطابق وزیراعظم اپنے دورہ آذربائیجان کے دوران صدر الہام علیوف سے ملاقات کریں گے، جس میں دوطرفہ تعلقات کے تمام پہلوؤں کا تفصیلی جائزہ لیا جائے گا۔ ملاقات میں تجارت و سرمایہ کاری، توانائی، دفاع، تعلیم اور علاقائی روابط سمیت مختلف شعبوں میں تعاون کے فروغ پر بات چیت ہوگی۔
پاکستان اور آذربائیجان کے درمیان دیرینہ برادرانہ تعلقات قائم ہیں جو مشترکہ عقیدے، تاریخ، ثقافت اور باہمی اعتماد پر مبنی ہیں۔ دونوں ممالک اسلامی تعاون تنظیم (OIC)، اقتصادی تعاون تنظیم (ECO) اور اقوامِ متحدہ جیسے علاقائی و عالمی فورمز پر بھی قریبی اشتراک رکھتے ہیں۔
وزیراعظم کا یہ دورہ آذربائیجان کی خودمختاری اور علاقائی سالمیت کے لیے پاکستان کی غیر متزلزل حمایت کے اعادے کے ساتھ دونوں ممالک کے درمیان اسٹریٹجک شراکت داری کو مزید مضبوط بنانے کا باعث بنے گا۔