صدرِ مملکت آصف علی زرداری نے امیرِ قطر شیخ تمیم بن حمد الثانی سے ملاقات کی۔ ملاقات میں چیئرمین پیپلز پارٹی بلاول بھٹو زرداری اور پاکستانی سفیر بھی شریک تھے۔
صدر آصف علی زرداری سے قطری وزیراعظم شیخ محمد بن عبدالرحمان کی ملاقات، دوطرفہ تعلقات، تجارت و سرمایہ کاری کے فروغ پر اتفاق
صدرِ مملکت نے امیرِ قطر کو حکومتِ پاکستان اور عوام کی جانب سے نیک تمناؤں کا پیغام پہنچایا اور قطر کی ترقی، استحکام اور امیرِ قطر کی بصیرت افروز قیادت کو خراجِ تحسین پیش کیا۔
انہوں نے دفاع، دفاعی پیداوار، زراعت اور غذائی تحفظ کے شعبوں میں باہمی تعاون مزید بڑھانے کی تجویز دی، جس پر امیرِ قطر نے فوری رابطوں اور تعاون کے فروغ پر رضامندی ظاہر کی۔
امیرِ قطر نے قطر میں مقیم پاکستانی کمیونٹی کے کردار کی تعریف کی اور ان کی تعداد میں اضافے کی خواہش کا اظہار کیا۔ ان کا کہنا تھا کہ قطر کو پاکستان اور اس کی کامیابیوں پر فخر ہے، جبکہ دونوں رہنماؤں نے تاریخی اور برادرانہ تعلقات کو مزید مضبوط بنانے کے عزم کا اظہار کیا۔
امیرِ قطر نے پاکستان اور سعودی عرب کے درمیان حالیہ دفاعی معاہدے کو خوش آئند اور بروقت قرار دیا اور کہا کہ پاکستان ایک منفرد ملک ہے جو چین، مغرب اور خلیجی ممالک سے بیک وقت مضبوط تعلقات رکھتا ہے۔
امیرِ قطر نے امید ظاہر کی کہ پاکستان اور افغانستان حالیہ چیلنجز کو حل کرکے باہمی تعلقات کو مستحکم بنائیں گے۔
صدرِ مملکت آصف علی زرداری نے افغانستان سے متعلق قطر کے مثبت کردار اور دوحہ مذاکرات کی میزبانی کو سراہا اور امیرِ قطر کو پاکستان کے دورے کی دعوت دی، جسے امیرِ قطر نے آئندہ سال کے اوائل میں قبول کرنے کا اعلان کیا۔
اس سے قبل، صدرِ مملکت آصف علی زرداری نے چین کے نائب صدر ہان ژنگ سے بھی ملاقات کی، جو دوحہ میں جاری سماجی ترقی سے متعلق دوسری عالمی کانفرنس کے موقع پر ہوئی۔
اس موقع پر صدر زرداری نے کہا کہ پاکستان اور چین آہنی بھائی اور ہر موسم کے اسٹریٹجک شراکت دار ہیں۔ انہوں نے سی پیک کے کامیاب نفاذ اور چین کے تعاون کو سراہا اور کہا کہ چین سے دوستی پاکستان کی خارجہ پالیسی کا بنیادی ستون ہے۔