راولپنڈی (اسٹاف رپورٹس) پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے سیلاب سے متاثرہ علاقوں کا دورہ کیا، جس کا مقصد سول انتظامیہ اور فوج کے درمیان ہم آہنگی کو مزید مؤثر بنانا اور متاثرہ آبادی کو بروقت امداد فراہم کرنے کے اقدامات کو مربوط کرنا تھا۔ اس موقع پر چیف سیکرٹری پنجاب اور سول انتظامیہ کے اعلیٰ حکام بھی موجود تھے۔
خیبرپختونخوا میں سیکیورٹی فورسز کی کارروائیاں 35 بھارتی سپانسرڈ خارجی ہلاک 12 جوان شہید
آرمی چیف کو متاثرہ علاقوں کی زمینی صورتحال اور جاری ریسکیو و ریلیف آپریشنز پر تفصیلی بریفنگ دی گئی۔ انہوں نے سول انتظامیہ سے ملاقات کے دوران کہا کہ ریاست ہر سال قیمتی جانوں اور املاک کے نقصان کی متحمل نہیں ہو سکتی، لہٰذا ضروری ہے کہ سیلابی صورتحال میں عوام کو محفوظ رکھنے کے لیے تمام اقدامات تیز رفتاری سے مکمل کیے جائیں۔
فیلڈ مارشل عاصم منیر نے اس بات پر زور دیا کہ بہتر حکمرانی اور عوامی فلاح و بہبود کے لیے مربوط حکمت عملی اپنانا ناگزیر ہے تاکہ ہر سال ہونے والے جانی و مالی نقصان کو روکا جا سکے۔
دورے کے دوران آرمی چیف نے سیلاب متاثرین سے ملاقات کی، جنہیں پاک فوج اور سول انتظامیہ نے بروقت محفوظ مقامات پر منتقل کیا تھا۔ متاثرین نے بروقت امداد اور محفوظ انخلا پر پاک فوج کا شکریہ ادا کیا۔
آرمی چیف نے متاثرین کو مکمل بحالی اور آبادکاری میں بھرپور تعاون کی یقین دہانی کرائی۔ انہوں نے ریلیف آپریشن میں مصروف پاک فوج کے جوانوں، ریسکیو 1122 اور پولیس اہلکاروں سے بھی ملاقات کی اور ان کے بلند حوصلے اور خدمات کو سراہا۔
فیلڈ مارشل نے کہا کہ فوج سول انتظامیہ کے ساتھ مل کر چوبیس گھنٹے ریلیف آپریشن میں مصروف ہے تاکہ متاثرہ آبادی کو فوری اور مؤثر امداد فراہم کی جا سکے۔
عاصم منیر نے لاہور، قصور اور ملتان جلالپور پیروالا کے سیلاب متاثرہ علاقوں کا فضائی جائزہ بھی لیا تاکہ نقصان کے تخمینے اور جاری اقدامات کا براہِ راست معائنہ کیا جا سکے۔
