بھٹ شاہ (اسٹاف رپورٹر) پاکستان پیپلز پارٹی کے چیئرمین بلاول بھٹو زرداری نے کہا ہے کہ اگر جنگ چھیڑی گئی تو مودی حکومت کو بتا دیں گے کہ ہم جھکنے والے نہیں۔
آفاق احمد کا پیپلز پارٹی پر نسلی امتیاز اور ڈمپر مافیا سے گٹھ جوڑ کا الزام
شاہ عبد الطیف بھٹائیؒ کے عرس کی تقریب سے خطاب کرتے ہوئے بلاول بھٹو نے کہا کہ بھارت نے رات کے اندھیرے میں پاکستان پر جنگ مسلط کی، مگر پاکستان نے جس انداز میں دشمن کو جواب دیا وہ تاریخ میں سنہری حروف سے لکھا جائے گا۔
انہوں نے کہا کہ پاکستان نے جنگ کا آغاز نہیں کیا، لیکن ختم ضرور کی، اور اس کے بعد بھارت نے بزدلانہ انداز میں پاکستان کے پانی پر حملہ کیا۔ سندھ طاس معاہدے کی معطلی سندھو دریا پر تاریخ کا سب سے بڑا حملہ ہے۔ بلاول بھٹو نے کہا کہ بھارت یکطرفہ طور پر سندھ طاس معاہدہ ختم نہیں کرسکتا، یہ ہماری سرزمین اور ثقافت پر حملہ ہے۔
انہوں نے خبردار کیا کہ اگر بھارت نہ مانا تو پاکستان ایک اور جنگ کرے گا اور چھ کے چھ دریا واپس لے گا۔ عوام میں اتنی طاقت ہے کہ ہم اپنے تمام دریاؤں کا دفاع کرسکتے ہیں۔
بلاول بھٹو کا کہنا تھا کہ سفارتی مہم کے دوران دنیا کو مودی کے سندھ پر حملے سے آگاہ کیا گیا ہے۔ ہماری ہزاروں سال پرانی تاریخ اور ثقافت سندھو دریا سے جڑی ہوئی ہے، اس لیے اس پر کوئی سمجھوتہ نہیں ہوگا۔ پانی 24 کروڑ پاکستانیوں کی زندگی ہے اور بھارت کی آبی جارحیت کے خلاف دنیا بھر میں آواز بلند کی گئی ہے۔