کراچی (کامرس رپورٹر) — وفاقی وزیر خزانہ محمد اورنگزیب نے کہا ہے کہ حکومت کے دانشمندانہ فیصلوں اور واضح معاشی پالیسیوں کی بدولت ملک معاشی استحکام کی جانب گامزن ہے، جب کہ نجکاری اور بینکاری نظام میں اصلاحاتی عمل بھی تیزی سے جاری ہے۔
چیلسی نے فیفا کلب ورلڈ کپ جیت لیا، پی ایس جی کو 0-3 سے شکست؛ فائنل میں ٹرمپ کی موجودگی پر تنازع
کراچی میں پریس کانفرنس سے خطاب کرتے ہوئے وزیر خزانہ نے کہا کہ آج گورنر اسٹیٹ بینک اور کمرشل بینکوں کے صدور سے ملاقات ہوئی، جس میں ان سے پوچھا گیا کہ موجودہ معاشی استحکام میں بینکوں کا کردار کیا ہو سکتا ہے۔
بینکوں کا کردار اہم، نجی شعبے کے قرض میں اضافہ ضروری
محمد اورنگزیب نے کہا کہ معاشی ترقی میں بینکوں کا کلیدی کردار ہے، اور نجی شعبے کو زیادہ قرض فراہم کرنا وقت کی ضرورت ہے۔ انہوں نے زور دیا کہ گردشی قرضے میں کمی اور نجکاری عمل میں بھی بینکوں کو اپنا بھرپور کردار ادا کرنا ہوگا۔
وزیر خزانہ کے مطابق، بیمار صنعتوں کی بحالی اور مقامی و غیر ملکی سرمایہ کاری کے فروغ میں بھی بینکاری نظام اہم ستون بن سکتا ہے۔
سرمایہ کاروں کے مسائل حل، منافع کی منتقلی بحال
محمد اورنگزیب نے بتایا کہ اب بیرونی سرمایہ کاروں کو منافع کی منتقلی، ایل سی کے اجرا اور دیگر رکاوٹوں کا سامنا نہیں۔ 30 جون 2025 کو ختم ہونے والے مالی سال میں ملٹی نیشنل کمپنیوں نے 2 ارب 30 لاکھ ڈالر کا منافع بیرون ملک منتقل کیا ہے، جو معیشت میں اعتماد کی علامت ہے۔
ایف بی آر کو اختیارات صرف سیلز ٹیکس فراڈ تک محدود
ایف بی آر کو دیے گئے اضافی اختیارات کے حوالے سے سوال کے جواب میں وزیر خزانہ نے وضاحت کی کہ یہ اختیارات انکم ٹیکس کے بجائے صرف سیلز ٹیکس فراڈ سے متعلق ہیں، اور ان کا اطلاق صرف اُن کیسز پر ہوگا جہاں فراڈ کی رقم 5 کروڑ روپے سے تجاوز کرے۔
انہوں نے کہا کہ گرفتاری کا اختیار کسی کمشنر کو نہیں بلکہ تین رکنی اعلیٰ سطحی کمیٹی کو حاصل ہوگا تاکہ شفافیت کو یقینی بنایا جا سکے۔
تنخواہ دار طبقے کو ریلیف، ٹیکس گوشوارے آسان
تنخواہ دار طبقے کے لیے وزیر خزانہ نے اعلان کیا کہ ان کی سہولت کے لیے آسان ٹیکس گوشوارہ فارم ایف بی آر کی ویب سائٹ پر اپلوڈ کر دیا گیا ہے، اور اس سہولت کو چھوٹے تاجروں اور ایس ایم ایز تک توسیع دی جائے گی۔
سیلز ٹیکس ریفنڈز اور کاروباری برادری کا اعتماد
محمد اورنگزیب نے بتایا کہ حکومت کی جانب سے رواں ماہ میں 75 ارب روپے کے سیلز ٹیکس ریفنڈز جاری کیے جا چکے ہیں، جو کاروباری طبقے کے لیے ایک مثبت پیغام ہے اور معیشت میں اعتماد کی بحالی کی سمت ایک بڑا قدم ہے۔
ترقی کی خواہش مگر زرمبادلہ کا دباؤ خطرناک
وزیر خزانہ نے تسلیم کیا کہ ہر وزیر خزانہ کی خواہش ہوتی ہے کہ شرح نمو میں تیزی سے اضافہ ہو، تاہم ایسا فوری کرنا زرمبادلہ کے ذخائر پر دباؤ کا سبب بن سکتا ہے، جس سے معیشت غیر مستحکم ہو سکتی ہے۔ ان کا کہنا تھا کہ مستحکم ترقی ہی واحد قابلِ عمل راستہ ہے۔