وفاقی وزیر داخلہ محسن نقوی نے اسلام آباد میں تمام مکاتبِ فکر کے علمائے کرام کے اجلاس سے خطاب کرتے ہوئے محرم الحرام کے دوران مذہبی ہم آہنگی اور اتحاد کی اہمیت پر زور دیا اور بھارت کے ساتھ جنگی تجربات کے تناظر میں اللہ کی مدد کا تذکرہ بھی کیا۔
Thursday, 3rd July 2025
انہوں نے تمام علمائے کرام کی شرکت پر شکریہ ادا کرتے ہوئے کہا کہ علما کا معاشرے میں کلیدی کردار ہے، قیامِ امن میں ان کی خدمات ناقابلِ فراموش ہیں۔ ان کا کہنا تھا کہ محرم کے دوران اتحاد و یگانگت کو فروغ دینا ضروری ہے۔
محسن نقوی نے کہا: "ہمیں اپنے مسلک پر قائم رہنا چاہیے، لیکن کسی دوسرے کے مسلک پر تنقید سے اجتناب برتنا چاہیے، امام حسینؓ تمام امت کے ہیں، کسی ایک فرقے کے نہیں۔”
وزیر داخلہ نے بھارت کے ساتھ ماضی کے ایک عسکری واقعے کا ذکر کرتے ہوئے کہا کہ بھارت کے خلاف جنگ میں اللہ کی غیبی مدد شامل تھی۔ ایک میزائل جو غلطی سے شہری آبادی کی طرف جا سکتا تھا، معجزانہ طور پر بھارت کے سب سے بڑے آئل ڈپو پر گرا اور بھاری نقصان کا سبب بنا۔
انہوں نے مزید انکشاف کیا کہ بھارت کی طرف سے فائر کیے گئے 9 سے 11 میزائل ایک اہم ایئربیس کو نشانہ بنانے کے باوجود بیس پر نہیں گرے، بلکہ آس پاس کے علاقوں میں گرے، جو ایک واضح نشانی ہے کہ اللہ کی مدد ساتھ تھی۔
محسن نقوی نے کہا کہ اس وقت آرمی چیف نے انتہائی مضبوط اور واضح موقف اپنایا کہ اگر بھارت نے حملہ کیا تو اس کا چار گنا جواب دیا جائے گا — اور ایسا ہی ہوا۔
دہشت گردی کے خلاف بات کرتے ہوئے وزیر داخلہ نے خیبر پختونخوا کی صورتحال پر تشویش کا اظہار کیا۔ انہوں نے کہا کہ جب تک مقامی لوگ دہشت گردوں کی مدد کرنا بند نہیں کرتے، اس لعنت کا خاتمہ ممکن نہیں۔
انہوں نے اعلان کیا کہ محرم کے بعد ملک کے تمام مکاتبِ فکر کے علمائے کرام کو ساتھ لے کر دہشت گردی سے متاثرہ علاقوں کا دورہ کیا جائے گا اور 14 اگست کو فیصل مسجد میں علما کے ساتھ ظہر کی نماز ادا کی جائے گی، تاکہ دنیا کو یہ پیغام جائے کہ پاکستان متحد ہے۔