کراچی (تشکر نیوز) ایڈیشنل آئی جی کراچی جاوید عالم اوڈھو نے کہا کہ یوم قائداعظم اور کرسمس کی سیکیورٹی کے لیے شہر کے مختلف مقامات پر پولیس کے افسران اور جوان اپنی ذمہ داریاں ادا کر رہے ہیں۔ اس دوران، شہر بھر میں مجموعی طور پر 699 چرچوں کی سیکیورٹی کے لیے 3594 پولیس اہلکار تعینات کیے گئے ہیں۔
پاکستان کے بانی قائداعظم محمد علی جناح کی 148ویں سالگرہ پر واٹر کارپوریشن کے پیغامات، کرسمس کے موقع پر مسیحی برادری کو بھی مبارکباد
ایڈیشنل آئی جی کراچی نے بتایا کہ ضلع ایسٹ میں 469 چرچوں کی سیکیورٹی کے لیے 1628 پولیس کے جوان تعینات ہیں۔ ضلع ویسٹ میں 121 چرچوں پر 797 پولیس کے جوان تعینات ہیں، جبکہ ضلع ساؤتھ میں 109 چرچوں پر 1169 پولیس کے جوان تعینات کیے گئے ہیں۔
اس کے علاوہ، شہر بھر میں پولیس موبائلز اور موٹر سائیکلز سوار بھی گشت پر مامور ہیں تاکہ سیکیورٹی کو مزید موثر بنایا جا سکے۔
بانی پاکستان قائداعظم محمد علی جناح کے یوم پیدائش کی مناسبت سے مزار قائد پر گارڈز کی تبدیلی اور دیگر تقریبات کی سیکیورٹی کے لیے بھی پولیس کی بھاری نفری تعینات کی گئی ہے۔ مزار قائد کے اطراف بلند عمارتوں پر تربیت یافتہ اسنائپرز تعینات کیے گئے ہیں تاکہ سیکیورٹی کو مزید مستحکم کیا جا سکے۔
ٹریفک کی روانی اور عوام کی سیکیورٹی کے لیے مزار قائد اور چرچوں کے اطراف ٹریفک پولیس کی بھاری نفری بھی موجود رہے گی تاکہ شہریوں کو کسی بھی پریشانی سے بچایا جا سکے اور ٹریفک کی روانی برقرار رکھی جا سکے۔