تشکر نیوز: صوبائی وزیر توانائی، ترقیات و منصوبہ بندی سندھ سید ناصر حسین شاہ نے کہا ہے کہ غریب ترین افراد کی قوت خرید کے مطابق سستے اور معیاری سولر پینلز تیار کیے جائیں تاکہ عوامی افراد بھی متبادل توانائی کے اس نظام سے مستفید ہو سکیں۔ یہ خیالات انہوں نے آج ایکسپو سینٹر کراچی میں جاری تین روزہ سولر ایکسپو کے دوسرے روز مختلف اسٹالز اور میڈیا سے بات چیت کے دوران اظہار کیے۔
مقتول ڈاکٹر شاہنواز کے ماورائے عدالت قتل کے خلاف مقدمہ، پولیس افسران و دیگر ملزمان نامزد
اس موقع پر سیکریٹری انرجی سندھ مصدق احمد خان اور پروجیکٹ ڈائریکٹر سندھ سولر انرجی محفوظ احمد قاضی بھی ان کے ہمراہ تھے۔ وزیر توانائی نے ملکی اور غیر ملکی کمپنیوں کے اسٹالز کا دورہ کرتے ہوئے کہا کہ سندھ کے عوام مہنگی بجلی کا خرچ برداشت نہیں کر سکتے اور نہ ہی وہ مہنگے سولر سسٹمز خریدنے کی استطاعت رکھتے ہیں۔ انہوں نے زور دیا کہ سولر پینلز سے متعلقہ تمام اشیاء، بشمول بیٹری اور لیتھیم، ملکی سطح پر معیاری اور سستی تیار کی جائیں۔
ناصر حسین شاہ نے مزید کہا کہ سولر پینلز میں کمپنیوں کے درمیان مقابلے کی وجہ سے قیمتوں میں کمی آئی ہے، تاہم مزید کمی کی ضرورت ہے۔ انہوں نے ایک سوال کے جواب میں کہا کہ عوام مہنگی بجلی، لوڈشیڈنگ، اور زائد بلنگ کی وجہ سے شدید پریشانی میں مبتلا ہیں، لیکن سندھ حکومت نے اس معاملے کا نوٹس لیا ہے اور عوام کو جلد خوشخبری ملنے کی توقع ہے۔
انہوں نے یہ بھی بتایا کہ نیشنل گرڈ کو سب سے سستی بجلی سندھ فراہم کر رہا ہے۔ انہوں نے کہا کہ مہنگی کھاد کی وجہ سے کاشتکار اور غریب کسان بھی پریشان ہیں، تاہم حکومت نے ان کی مشکلات کے حل کے لیے تھر کے کوئلے سے سستی کھاد تیار کرنے کا منصوبہ بنایا ہے۔
ناصر حسین شاہ نے نمائش میں شرکت کرنے والی 10 ممالک کی 200 سے زائد کمپنیوں کی موجودگی کی اہمیت پر زور دیا، جن میں 80 فیصد عالمی معیار کی کمپنیاں شامل ہیں۔ انہوں نے نمائش کے منتظمین کی کوششوں کی تعریف کی اور کہا کہ اس طرح کے ایونٹس سے نہ صرف سندھ حکومت کا بلکہ پاکستان کا مثبت امیج بھی بین الاقوامی سطح پر پیش ہوتا ہے۔
انہوں نے تجویز دی کہ نمائش کا دورانیہ تین دن کے بجائے کئی دنوں تک بڑھایا جانا چاہیے تاکہ لوگوں کو مزید آگاہی حاصل ہو سکے اور مقامی و عالمی کمپنیوں کے معیار کا بھی پتہ چل سکے۔ وزیر توانائی نے اعلان کیا کہ سندھ کے غریب اور پسماندہ علاقوں کے عوام کو ایک لاکھ ساٹھ ہزار سے زائد سولر سسٹمز، بشمول انورٹرز اور بیٹری بیک اپ، مفت فراہم کیے جائیں گے، اور ہائیبرڈ سولر پارکس بھی متعارف کرائے جائیں گے۔