کراچی، 17 مارچ 2026ء: ضلع ملیر پولیس کے سربراہ ڈاکٹر عبدالخالق نے شہید پولیس افسران و جوانوں کے اہل خانہ سے ملاقات کی اور ان کی عظیم قربانیوں کو خراجِ عقیدت پیش کیا۔ اس موقع پر انہوں نے شہداء کے خاندانوں سے اظہارِ یکجہتی کرتے ہوئے یقین دلایا کہ سندھ پولیس ہمیشہ ان کے ساتھ کھڑی رہے گی۔
کراچی: کرائم رپورٹرز ایسوسی ایشن کی افطار ڈنر تقریب، آئی جی سندھ سمیت اہم شخصیات کی شرکت
ایس ایس پی ملیر ڈاکٹر عبدالخالق نے کہا کہ شہداء کی لازوال قربانیاں ہماری تاریخ کا سنہری باب ہیں اور انہی قربانیوں کی بدولت معاشرے میں امن و امان قائم ہے۔ انہوں نے اس عزم کا اعادہ کیا کہ پولیس اپنے شہداء کے خاندانوں کو کبھی تنہا نہیں چھوڑے گی اور ان کے مسائل کے حل کے لیے ہر ممکن اقدامات جاری رکھے جائیں گے۔
ملاقات کے دوران انہوں نے شہداء کے اہل خانہ کو درپیش مسائل سنے اور یقین دہانی کرائی کہ پولیس ان کی فلاح و بہبود کے لیے ہر سطح پر تعاون فراہم کرے گی۔ انہوں نے کہا کہ شہداء کی قربانیاں ہمارے حوصلے کی بنیاد ہیں اور ان کے اہل خانہ ہمارے دلوں میں خاص مقام رکھتے ہیں۔
اس موقع پر ایس ایس پی ملیر نے عید کی خوشیوں میں شریک ہوتے ہوئے شہداء کے اہل خانہ کو پھولوں کے گلدستے اور عیدی بھی پیش کی۔ اس اقدام کو اہل خانہ نے سراہتے ہوئے اسے حوصلہ افزا قرار دیا اور پولیس کے اس جذبے کو قابلِ تحسین بتایا۔
شہداء کے اہل خانہ نے پولیس کے ساتھ اپنے رشتے پر فخر کا اظہار کرتے ہوئے مکمل اعتماد کا اعادہ کیا اور اس عزم کا اظہار کیا کہ وہ ہمیشہ قانون نافذ کرنے والے اداروں کے ساتھ کھڑے رہیں گے۔
ترجمان ملیر پولیس کے مطابق اس طرح کی ملاقاتیں نہ صرف شہداء کے خاندانوں کے حوصلے بلند کرتی ہیں بلکہ پولیس اور عوام کے درمیان اعتماد کے رشتے کو بھی مزید مضبوط بناتی ہیں۔