وفاقی وزیر داخلہ محسن نقوی نے غیر قانونی امیگریشن اور انسانی اسمگلنگ میں ملوث مافیا کے خلاف بلاامتیاز سخت کارروائیاں جاری رکھنے کے واضح احکامات جاری کر دیے ہیں۔ ان ہدایات کا اظہار انہوں نے اپنے زیرِ صدارت ہونے والے ایک اہم اجلاس کے دوران کیا۔
Friday, 9th January 2026
اجلاس میں وفاقی سیکرٹری داخلہ، ایڈیشنل سیکرٹری داخلہ، ڈائریکٹر جنرل ایف آئی اے اور کراچی و لاہور زون کے ڈائریکٹرز نے شرکت کی۔ اجلاس میں ایف آئی اے کے امیگریشن ونگ کی مجموعی کارکردگی، غیر قانونی امیگریشن اور انسانی اسمگلنگ کی روک تھام کے لیے جاری اقدامات کا تفصیلی جائزہ لیا گیا۔
اجلاس کے دوران پیشہ ور بھکاری مافیا کے خلاف جاری کارروائیوں پر بھی غور کیا گیا۔ وزیر داخلہ محسن نقوی نے واضح کیا کہ انسانی اسمگلنگ میں ملوث عناصر کسی قسم کی رعایت کے مستحق نہیں ہیں اور ان کے خلاف قانون کے مطابق سخت کارروائی کی جائے گی۔
محسن نقوی نے ہدایت کی کہ تمام ائیرپورٹس پر امیگریشن چیکنگ کے نظام کو مزید مؤثر بنایا جائے، جبکہ سفری دستاویزات کی سخت اسکریننگ کو یقینی بنایا جائے تاکہ جعلی یا مشکوک دستاویزات پر سفر کی ہر کوشش ناکام بنائی جا سکے۔
وفاقی وزیر داخلہ کا کہنا تھا کہ پاکستان کے وقار اور ساکھ پر کسی صورت آنچ نہیں آنے دی جائے گی اور ریاست غیر قانونی سرگرمیوں میں ملوث عناصر کے خلاف پوری قوت سے کارروائی جاری رکھے گی۔