اسلام آباد: پاکستان سپر لیگ (پی ایس ایل) کے لیے دو نئی ٹیموں کی نیلامی مکمل ہو گئی ہے، جس میں حیدرآباد کی ٹیم 175 کروڑ روپے اور سیالکوٹ کی ٹیم 185 کروڑ روپے میں فروخت ہوئی۔ جناح کنوینشن سینٹر میں منعقدہ تقریب میں پاکستان کرکٹ بورڈ (پی سی بی) کے چیئرمین محسن نقوی، وفاقی وزرا، کھلاڑی اور دیگر حکام شریک ہوئے۔
پی ایس ایل کی دو نئی ٹیموں کی نیلامی کامیاب، امریکی سرمایہ کاری بھی شامل
تقریب کے آغاز میں نیلامی میں حصہ لینے والے نو بڈرز اور چھ ممکنہ شہروں کا تعارف کرایا گیا۔ چیئرمین پی سی بی نے گھنٹی بجا کر نیلامی کا باضابطہ آغاز کیا جبکہ وسیم اکرم نے آکشنر کی ذمہ داریاں سنبھالیں۔ بیس پرائز 110 کروڑ روپے مقرر کی گئی تھی اور ہر بولی میں کم از کم ایک کروڑ روپے کے اضافے کی شرط رکھی گئی۔
پی ایس ایل کی آٹھویں ٹیم کے لیے ریکارڈ بولی او زیڈ ڈیولپرز نے لگائی اور 185 کروڑ روپے میں سب سے مہنگی ٹیم خرید لی، جس کے لیے سیالکوٹ کا نام چنا گیا۔ پہلے مرحلے میں ایف کے ایس گروپ نے 175 کروڑ روپے میں ساتویں ٹیم خرید کر اسے حیدرآباد کے نام سے منسوب کیا۔
تقریب کے دوران پاکستان شاہینز اور ہانگ کانگ سکسز کی حالیہ ٹورنامنٹس میں کامیاب ٹیموں کو بھی انعامات سے نوازا گیا۔ ہانگ کانگ سپر سکسز کی فاتح پاکستانی ٹیم کو 1.85 کروڑ روپے جبکہ رائزنگ اسٹارز ایشیا کپ کی فاتح ٹیم کو 9 کروڑ روپے دیے گئے۔
پی ایس ایل کے سی ای او سلمان نصیر نے خطاب کرتے ہوئے کہا کہ لیگ کی ایک دہائی چیلنجز اور کامیابیوں سے بھری رہی ہے، اور آج پی ایس ایل دنیا کی بہترین لیگس میں شامل ہے۔ انہوں نے ٹیموں، کھلاڑیوں، اسپانسرز اور فرنچائز کا شکریہ ادا کیا۔
پی ایس ایل سیزن 11 کا آغاز 26 مارچ سے 3 مئی 2026ء تک ہوگا، اور نئی ٹیموں کی شمولیت کے بعد ٹیموں کی تعداد 6 سے بڑھ کر 8 ہو جائے گی۔