برطانوی خبر رساں ادارے ’رائٹرز‘ کے مطابق تھائی لینڈ اور کمبوڈیا کی سرحد پر ایک بار پھر کشیدگی میں اضافہ ہو گیا ہے، جہاں تازہ جھڑپوں میں کم از کم ایک تھائی فوجی ہلاک اور چار زخمی ہوگئے۔ تھائی فوج نے بتایا کہ مشرقی صوبے اُوبون رچا تھانی کے دو مقامات پر اس وقت فائرنگ کا تبادلہ شروع ہوا جب تھائی دستے کمبوڈین افواج کی فائرنگ کی زد میں آئے۔
سندھ میں صوبائی سائبر کرائم یونٹ کے قیام پر غور وفاق سے اجازت طلب کی جائے گی
فوجی بیان میں کہا گیا ہے کہ جھڑپوں کے بعد تھائی فورسز نے کئی علاقوں میں کمبوڈین فوجی اہداف پر فضائی حملے کیے۔ دوسری جانب کمبوڈیا کی وزارتِ دفاع نے الزام عائد کیا کہ تھائی فوج نے علی الصبح دو مقامات پر حملے کیے، تاہم دعویٰ کیا کہ کمبوڈین افواج نے کوئی جوابی کارروائی نہیں کی۔
تھائی فوج نے مزید کہا کہ کمبوڈین فورسز نے تھائی شہری علاقوں کی طرف BM-21 راکٹ فائر کیے، تاہم جانی نقصان کی اطلاعات نہیں ملیں۔ کشیدہ صورتحال کے دوران ملائیشیا کے وزیرِاعظم اور آسیان کے چیئرمین انور ابراہیم نے دونوں ممالک پر زور دیا کہ تحمل کا مظاہرہ کریں ورنہ جنگ بندی کی بحالی کی تمام کوششیں ضائع ہوسکتی ہیں۔
یاد رہے کہ دونوں ممالک کے درمیان جولائی میں جھڑپیں پانچ روزہ جنگ میں بدل گئی تھیں، جس کے بعد ملائیشیا اور امریکہ کے سابق صدر ڈونلڈ ٹرمپ کی ثالثی سے جنگ بندی طے پائی تھی۔ اس کے باوجود سرحدی کشیدگی وقفے وقفے سے جاری ہے، جبکہ کئی علاقوں میں دوبارہ تنازع بھڑکنے کے خدشات بڑھتے جا رہے ہیں۔
تھائی فوج کے مطابق سرحدی اضلاع سے 3 لاکھ 85 ہزار سے زائد شہریوں کا انخلا جاری ہے، جن میں سے 35 ہزار سے زائد لوگ عارضی پناہ گاہوں میں منتقل کیے جا چکے ہیں۔ دونوں ممالک ایک صدی سے زائد عرصے سے 817 کلومیٹر طویل غیر حدبندی شدہ سرحد پر ملکیت کے تنازع میں الجھے ہوئے ہیں، جو اکثر جھڑپوں کا سبب بنتا ہے۔