کراچی (تشکر نیوز): اطالوی بحریہ کا مشہور تربیتی اور سیلنگ جہاز "آئی ٹی ایس امریگو وسپوچی” تین روزہ خیر سگالی دورے کے لیے کراچی کی بندرگاہ پہنچ گیا۔
خیبرپختونخوا میں پاک فوج کی بڑی کارروائی: 22 دہشتگرد ہلاک، 6 جوان شہید
جہاز کی آمد پر پاکستان اور اطالوی بحریہ کے اعلیٰ حکام نے استقبال کیا، جبکہ پاکستان میں اٹلی کی سفیر محترمہ ماریلینا ارمیلن بھی موجود تھیں۔ تقریب کے دوران دونوں ممالک کے بحری حکام نے گرم جوشی کے ساتھ ایک دوسرے کا خیر مقدم کیا، جو پاک-اٹلی تعلقات کے فروغ کا عکاس ہے۔
یہ دورہ اطالوی بحریہ کے کسی بھی جہاز کا پاکستان کا پہلا موقع ہے اور گزشتہ دو ماہ میں اطالوی بحری جہازوں کا کراچی کا تیسرا مسلسل دورہ ہے۔ یہ اقدام دونوں ممالک کے درمیان مضبوط سفارتی تعلقات اور بحری شراکت داری کو فروغ دینے کی ایک کوشش کے طور پر دیکھا جا رہا ہے۔
پاک بحریہ کے ترجمان نے کہا کہ پاکستان بحری سلامتی کے فروغ اور عالمی بحری افواج کے ساتھ دوطرفہ تعاون کو مزید مضبوط کرنے کے لیے پرعزم ہے، تاکہ سمندر میں امن و استحکام کو یقینی بنایا جا سکے۔
دورے کے دوران اطالوی عملے نے پاک بحریہ کے افسران اور اہلکاروں کے ساتھ پیشہ ورانہ گفتگو کی اور دونوں ممالک کی بحری تاریخ، تجربات اور مہارت کے تبادلے پر زور دیا۔