تشکرنیوز: کراچی کے ڈپٹی انسپیکٹر جنرل ٹریفک پولیس، احمد نواز، نے آج یومِ شہدائے پولیس کے موقع پر شہداء کو خراج تحسین پیش کیا۔ اس موقع پر انہوں نے یادگار شہداء پر حاضری دی، پھولوں کی چادر چڑھائی، اور فاتحہ خوانی کی۔ پولیس کے چاق و چوبند دستے نے بھی یادگار شہداء پر سلامی دی۔
یومِ شہدائے پولیس کے موقع پر ملک بھر میں ان پولیس جوانوں کو خراج تحسین پیش کیا جاتا ہے جنہوں نے وطن عزیز کی حفاظت اور امن و استحکام کے لیے اپنی جانوں کا نذرانہ پیش کیا۔ یہ دن ان افسران اور جوانوں کی قربانیوں کو خراج عقیدت پیش کرنے کا موقع ہے جنہوں نے اپنے فرائض کی ادائیگی کے دوران جام شہادت نوش کیا۔
قائد آباد میں پولیس اہلکار کے قتل کے ملزم کی گرفتاری
ڈی آئی جی ٹریفک کراچی احمد نواز نے اس موقع پر کہا کہ یومِ شہدائے سندھ پولیس دراصل تجدید عہد کا دن ہے۔ انہوں نے شہداء کو یقین دلایا کہ ان کی قربانیاں ہمیشہ یاد رکھی جائیں گی اور شہریوں کے جان و مال کے تحفظ کو یقینی بنانے کے لیے ہر ممکن اقدامات کیے جائیں گے۔
احمد نواز نے کہا، "ہم اپنے شہداء کو نہیں بھولے، ان کی قربانیاں سندھ پولیس کی امن و امان کی فضاء برقرار رکھنے میں کلیدی کردار ادا کر رہی ہیں۔” انہوں نے مزید کہا کہ "ہم شہداء کے خاندانوں کی ویلفیئر ہماری اولین ترجیح ہے اور وطن عزیز پر قربان ہونے والی ماؤں کو بھی سلام پیش کرتا ہوں۔”
یومِ شہدائے پولیس کے موقع پر شہداء کی قربانیوں کو سراہتے ہوئے، سندھ پولیس نے اس بات کا عزم کیا ہے کہ وہ اپنے فرائض کی انجام دہی میں کوئی کسر نہیں چھوڑے گی اور ہر ممکن کوشش کرے گی کہ امن و امان کی فضا برقرار رہے۔