کراچی: آرٹس کونسل آف پاکستان کراچی کے الیکشن برائے 2025-2026ء کے لیے 17 نشستوں پر کل 51 امیدواروں نے کاغذات نامزدگی جمع کرائے ہیں۔ ان میں صدارت کے لیے 4، نائب صدارت کے لیے 4، سیکریٹری کے لیے 4، جوائنٹ سیکریٹری کے لیے 3، خازن کے لیے 3 اور گورننگ باڈی کے لیے 33 امیدواران شامل ہیں۔
کاغذات نامزدگی جمع کرانے کی آخری تاریخ 12 دسمبر 2024ء شام 5 بجے تک رکھی گئی تھی۔ اس سلسلے میں انتخابات کے شفاف انعقاد کے لیے آرٹس کونسل کراچی میں الیکشن کیمپ آفس قائم کیا گیا ہے، جہاں علاقہ اسسٹنٹ کمشنر، چیف الیکشن کمشنر اور کمشنر کراچی کے نمائندے بھی موجود تھے۔
صدارت کے لیے محمد احمد شاہ کے علاوہ پروفیسر اعجاز احمد فاروقی، نجم الدین شیخ اور جاوید حسن نے کاغذات نامزدگی جمع کروائے ہیں۔ نائب صدر کے لیے منور سعید، غازی صلاح الدین، محمد اشرف جبار اور قندیل جعفری شامل ہیں۔ سیکریٹری کے لیے اعجاز احمد فاروقی، ہما میر، مبشر میر اور منصور زبیری نے کاغذات جمع کرائے ہیں۔
جوائنٹ سیکریٹری کے لیے نور الہدیٰ شاہ، امجد سراج میمن اور اقبال احمد سہوانی کے نام شامل ہیں۔ خازن کی نشست کے لیے قدسیہ اکبر، سید تحسیم الحق حقی اور اخلاق احمد خان نے کاغذات جمع کروائے ہیں۔
گورننگ باڈی کے لیے دراخوست فارم جمع کرانے والے امیدواروں میں منور سعید، نور الہدیٰ شاہ، قدسیہ اکبر، ہما میر، ایس ایم قیصر سجاد، سید اسجد حسین بخاری، فرخ تنویر شہاب، سید شہزاد رضا نقوی، سید ساجد حسن، ڈاکٹر عنبریں حسیب، اخلاق احمد خان اور دیگر امیدوار شامل ہیں۔
اس موقع پر محمد احمد شاہ نے غیر رسمی گفتگو کرتے ہوئے کہا کہ "میں چاہتا ہوں کہ الیکشن ہوں، میں بھاگنے والوں میں سے نہیں ہوں۔ آج یہاں اتنی بڑی تعداد دیکھ کر خوشی محسوس کر رہا ہوں، اور میں امید کرتا ہوں کہ 22 دسمبر کو ہونے والے الیکشن میں جیت آپ کا مقدر بنے گی۔”