ایلون مسک کی مجموعی دولت میں غیر معمولی اضافہ ہوا ہے، اور وہ اب دنیا کے امیر ترین شخص بن چکے ہیں۔ ان کے اثاثوں کی مالیت 348 ارب ڈالر تک جا پہنچی ہے، جس کی بدولت وہ دنیا کی تاریخ کے سب سے زیادہ دولت مند فرد بن گئے ہیں۔
امریکا کے انتخابات میں ڈونلڈ ٹرمپ کی فتح کے بعد ایلون مسک کی الیکٹرک کاروں بنانے والی کمپنی ٹیسلا اور ان کی اے آئی کمپنی ایکس اے آئی (XAI) کی مالیت میں نمایاں اضافہ ہوا، جس نے ان کی مجموعی دولت میں 70 ارب ڈالر کا اضافہ کر دیا۔ بھارتی اخبار "ٹائمز آف انڈیا” کی رپورٹ کے مطابق، صرف پچھلے 20 دنوں میں مسک کی دولت میں اس قدر اضافہ ہوا ہے۔
ایلون مسک کی خالص مالیت اب 334.3 ارب ڈالر تک پہنچ چکی ہے، جس کی بدولت وہ برنارڈ آرناولٹ کو پیچھے چھوڑ کر دنیا کے سب سے امیر شخص بنے ہیں۔ ان کی کمپنی ٹیسلا کے حصص کی قیمتوں میں زبردست اضافہ دیکھنے کو ملا ہے، جس کا تعلق امریکی انتخابات کے نتائج اور نئی انتظامیہ کے متوقع ڈی ریگولیشنز سے ہے۔ اس کے علاوہ، ٹیسلا کی خود کار ڈرائیونگ ٹیکنالوجی نے بھی سرمایہ کاروں کا اعتماد جیتا ہے۔
یکم جون 2023 کو ایلون مسک کی دولت 192 ارب ڈالر تھی، لیکن گزشتہ 17 ماہ میں ان کی دولت میں ایک کھرب 60 ارب ڈالر کا حیرت انگیز اضافہ ہوا ہے۔
ایلون مسک سوشل میڈیا پلیٹ فارم "ایکس” (سابقہ ٹوئٹر) کے مالک بھی ہیں اور ان کی سرمایہ کاری ٹیکنالوجی اور خلائی سیٹلائٹس کے شعبے میں بھی موجود ہے۔ ان کی خلائی کمپنی "اسپیس ایکس” دنیا بھر کے فعال سیٹلائٹس کا 62 فیصد کنٹرول کرتی ہے، جو ان کی کامیابی اور سرمایہ کاری کی وسعت کو ظاہر کرتا ہے۔